ମୋ କାହାଣୀ

ନୁହେଁ ମୁଁ ରାଜାଟେ ନୁହେଁ ଅବା ରାଣୀ

ପ୍ରକୃତିର ଅଟେ ଋଣୀ 

ଜୀବନ ବୃତ୍ତାନ୍ତ କି ଲେଖିବି ମୋର

ବର୍ଣ୍ଣିଲେ ହେବ କାହାଣୀ |

ଜୀବନ ନାଟକେ ପରିଚୟ ଖୋଜେ

ଯାହାକି ଯାଇଛି ହଜି 

ପଥହରା ହୋଇ ଏଣେତେଣେ ବୁଲେ

ବଞ୍ଚିବାର ରାହା ଖୋଜି |

ସବୁ ହରାଇଲି କିଛି ନପାଇଲି

ଦୁଃଖକୁ ସାଉଁଟି ନେଲି 

ରୋଗ ଯନ୍ତ୍ରଣାକୁ ଶରୀରେ ବୋହିଲି

ଥକିଗଲି ଚାଲିଚାଲି |

ତଥାପି ଜୀଇଁଛି କ୍ଷଣିକ ଆଶାରେ

ଆଖିଲୁହ ଓଠେ ପିଇ 

ଵିଧି ଲିଖନ କି ବଦଳାଇ ଦେବି

ଧୈର୍ଯ୍ୟ ପରିସୀମା ଡେଇଁ |

ସତେ କେତେ ଅସହାୟ ଏ ମଣିଷ

ସଂଘର୍ଷର ପାଖେ ପୁଣି 

ଲେଖିଦେଲି ଯାହା ମିଛ ନୁହେଁ ଏହା

ଇଏ ଅଟେ ମୋ କାହାଣୀ |