Library
Profile
ମୋ ଭାଇ ହାତେ ବାନ୍ଧିବି ରାକ୍ଷୀ
ମୋ ଭାଇ ହାତେ ବାନ୍ଧିବି ରାକ୍ଷୀ
ଲକ୍ଷେ ରେ ଗୋଟିଏ ମୋ ଭାଇଟି ପରା
ମୋ ଜୀବନ ଧାରେ ସୁନ୍ଦର ତାରା
ସିଏ ମୋ ଆଶାର ଅମୃତ ଭାବନା
ପ୍ରତିଟି ଛନ୍ଦେ ଯେ ସ୍ନେହରେ ଭରା ।
ମନ ବାରଣ୍ଡା ମୋ ହସେ ତାକୁ ନେଇ
ସବୁ ଦୁଃଖ ମୋର ଉଭେଇ ଯାଏ
ସୁପୁତ୍ର ଭଳି ସେ ମନ କଥା ବୁଝେ
ନ କହିଲେ ମଧ୍ୟ ସେ ଅନୁଭବେ ।
ଜୀବନ ବେଳାରେ କେତେ ଯେ ତରଙ୍ଗ
ପିଟି ହୋଇ କେତେ ଗାଥା ଲେଖନ୍ତି
ଭାଇ ଟି ମୋହର ବୁଝାମଣା ସେତୁ
କିଏ ବା ଭାଙ୍ଗିବ ସେ ଶ୍ରଦ୍ଧା ଭକ୍ତି ।
ତା ଜନମ ମୋର ଶ୍ରେଷ୍ଠ ଖୁସୀ ପରା
ପୂର୍ଣ୍ଣିତାର ଦିବ୍ୟ ଭାବରେ ଭରା
ରକ୍ଷା ବନ୍ଧନ ତ ଦିବ୍ୟ ପ୍ରେମମୟ
ଭାଇ ଭଗିନୀ ର ସୂତ୍ରର ଧାରା ।
ରାକ୍ଷୀ ନୁହେଁ ଖାଲି ରେଶମୀ ସୂତା ଟେ
ସେ ସୂତା କୁହଇ ସଂସ୍କୃତି ଗାଥା
ଭାଇ ଭଉଣୀର ସମ୍ପର୍କ ସେତୁରେ
ସେ ଅଟେ ଆମର ମନ ସଂହିତା ।
ଆମ ସଂସ୍କୃତିର କଳା ସାଆନ୍ତ ଯେ
ଭଗିନୀ ବନ୍ଧନେ ସଦା ବନ୍ଧିତ
ଭାଇ ଭଗିନୀର ଶୁଭ୍ର ମୟ ଭାବ
ତାଙ୍କ ସଂସ୍କୃତିର ପବିତ୍ର ସ୍ରୋତ ।
ମୋ ଭାଇ ମୋ ପାଇଁ ବିଶ୍ୱାସର ସେତୁ
ଆତ୍ମସନ୍ତୋଷର ପାଥେୟ ଟିଏ
ନିଆରା ତାହାର ହୃଦୟର ଭାବ
ସେ ଭାବ ମୁହଁରେ ଉକୁଟୁ ଥାଏ ।
ବିଧାତାର ଦାନ ପୁଣ୍ୟତୋୟା ଧାର
ଆମ ଏ ସଂପର୍କ ଚିର ଅମର
ବିଶ୍ୱାସ ସ୍ରୋତରେ ଭଟ୍ଟା ପଡ଼ି ବନି
ପ୍ରଭୁଙ୍କର ଦତ୍ତ ଏ ଉପହାର ।
ଭାଇ ମୋ ଅଟଇ ସ୍ଵଚ୍ଛ ସ୍ରୋତସ୍ୱିନୀ
ମୋ ଭାବର ଛବି ସଜଳ ଦିଶେ
ମନ ଗହନର ଅକୁହା କଥା ଯେ
ତରଙ୍ଗରେ ଭାସି ତା ମନେ ପଶେ ।
ତୋର ମୋର ଏଇ ସଂପର୍କ ସୂତ୍ର
ଅଛଣ୍ଡା ଅକ୍ଷୟ ପୂତ ପବିତ୍ର
ବଡ଼ ଭଉଣୀ ମୁଁ ତୋ ମାଆ ସମାନ
ବାନ୍ଧି ଦେବି ଆ ମମତା ସୂତ୍ର ।
ଆ ମୋ ଭାଇ ଚାହିଁ ବସିଛି ମୁଁ
ବାନ୍ଧିବି ତୋ ହାତେ ସ୍ନେହର ରାକ୍ଷୀ
କେବେ ଛିଡିବନି ଆମ ଏ ବନ୍ଧନ
ପ୍ରତି ବର୍ଷ ରାକ୍ଷୀ ରହୁଛି ସାକ୍ଷୀ ।
ତୁ ପରା ମୋହର ଆଶାର ଆଲୋକ
ଆଶିଷ ମୋହର ଦେଉ ସୁରକ୍ଷା
ରାକ୍ଷୀ ରେ ଭରୁଛି ଅସରା ପ୍ରେମ ଯେ ଜୀବନ ହେଉ ତୋ ବିପଦ ରକ୍ଷା ।
ପ୍ରତି ବରଷ ତ ଆସୁଛି ଏ ରାକ୍ଷୀ
ଏଇମିତି ଆସୁଥିବ ସଂସାରେ
ନଶ୍ଵର ଶରୀର ଥାଉ କି ନ ଥାଉ
ମନେ ପଡ଼ିଯିବ ରାକ୍ଷୀ ଦିନ ରେ ।
ଆ ମୋର ଭାଇ ଦୌତି ଆ ତୁ
ବାନ୍ଧି ଦେବି ହାତେ ସ୍ନେହର ରାକ୍ଷୀ
ଆମ ବନ୍ଧନର ପୂତ ପବିତ୍ରତା
ଏ ରାକ୍ଷୀ ହୋଇବ ଅସଲ ସାକ୍ଷୀ ।
ତୋ ହାତ ରାକ୍ଷୀର ପ୍ରଥମ ଗଣ୍ଠିରେ
ସ୍ନେହ ସୋହାଗ ମୁଁ ଭରି ଯେ ଦେବି
ଦ୍ଵିତୀୟ ଗଣ୍ଡିରେ ମମତାର ଧାରା
ହୃଦୟ କନ୍ଦରୁ ବୁହାଇ ଦେବି ।
ତୃତୀୟ ଗଣ୍ଠିରେ ଆଶିଷ ଢ଼ାଳିବି
ନିରାମୟତାର ସ୍ତୁତି କରିବି
ଚତୁର୍ଥ ଗଣ୍ଠିରେ ପ୍ରେମର ମହକ
ପଞ୍ଚମେ ଶାନ୍ତିର ବାରତା ଦେବି।
ଆ ମୋର ଭାଇ ଦଉଡ଼ି ଆ ତୁ
ତୋ ହାତେ ବାନ୍ଧିବି ଅଛିଣ୍ଡା ରାକ୍ଷୀ
ପ୍ରଭୁଙ୍କ ପଦରେ ଅର୍ପଣ କରିଛି
ଦେବେ ସିଏ ପରା କୃପା ବରଷି ।
ଅଛିଣ୍ଡା ଆମର ସଂପର୍କର ସୂତ୍ର
ନିବିଡ଼ ଆମର ସ୍ନେହ ବନ୍ଧନ
ଚିରଦିନ ରହୁ ଅକ୍ଷୟ ଅମର
ବୁଝାମଣା ସଦା ରହୁ ଅମ୍ଳାନ ।
ଆମ ସଂପର୍କ ତ ବିଧାନତାଙ୍କ ଦାନ
କିଏ ବା ତାହାକୁ ଛଣ୍ଡାଇ ଦେବ
ଆ ମୋର ଭାଇ ଦଉଡ଼ି ଆ ତୁ
ତୋ ବଡ଼ ଭଉଣୀ ରାକ୍ଷୀ ବାନ୍ଧିବ ।
