ମଜା ମୁଁ ପାଇଲି ଜଗା

ଏତେ କାଳ ଧରି-ତୋତେ ଭଜିବାର

ମଜା ମୁଁ ପାଇଲି ଜଗା ,

ଭାବି ନ ଥିଲି ମୋ ବିଶ୍ୱାସକୁ ଭାଙ୍ଗି

ଦେବୁବୋଲି ମୋତେ ଦଗା ।

ମୋର,କରମ ଏଡ଼ିକି ବାମ ;

ଯେ ଯେତେ କହିଲେ ଶୁଣିଲିନି କିଛି

ତୁଣ୍ଡେ ନେଲି ତୋର ନାମ ।(୦)

କେ କହିଲା-ତୁହି ଭାରି କପଟିଆ

ଆପଣା ଲୋକର ସଖା ,

କଥାଟି ତୋହର ଭାରି ଚିକ୍କଣିଆ

ସତେ କି ଲହୁଣି ମଖା ।

ଆନ ଜନଙ୍କୁ ତୁ ଇତର ମଣିକି

କରାଉ ଯାହା ଅଭାଗା !(୧)

ଭାବି ନ ଥିଲି ମୋ ବିଶ୍ୱାସକୁ ଭାଙ୍ଗି

ଦେବୁ ବୋଲି ମୋତେ ଦଗା ।

ଏଡ଼େ ବଡ଼ ନାଆଁ ବୋଲାଇ ଦେଖାଉ

ତୁ ପୁଣି ଛୋଟିଆ ପଣ ,

ଧୀରେଧୀରେ ଜଣାପଡ଼ି ସରିଲାଣି

ଯେତେକ ଗୁମର ଗୁଣ ।

ଉପରକୁ ସିନା ଏଡ଼େ ନିରିମଳ

ଭିତର ତୋ ଧୂଳିଲଗା ।(୨)

ଭାବି ନ ଥିଲି ମୋ ବିଶ୍ୱାସକୁ ଭାଙ୍ଗି

ଦେବୁବୋଲି ମୋତେ ଦଗା.....

(ଘୋଷ)

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।