ଲାଇବ୍ରେରୀ
ପ୍ରୋଫାଇଲ୍
ମିତଣୀ ଲୋ
ମିତଣୀ ଲୋ
1 min
392
ମିତଣୀ ଲୋ
ବଜାର ଯିବାକୁ ଲାଗୁଛି ଭୟ
ଟୋକାଏ ନୁହଁନ୍ତି ଜମାରୁ ଥୟ
ସୁସୁରି ମାରନ୍ତି ଆଗରେ ଲାଖି
ମାଆକି ଭଉଣୀ ନାହାନ୍ତି ଦେଖି
ମିତଣୀ ଲୋ
ଛାତିରେ ଛନକା ଯାଉଛି ପଶି
ଚପଳ ବୟସେ ଲାଗୁଛି ଦୋଷୀ
ଏଥିକୁ ଉପାୟ ଜାଣୁନି କିଛି
ଆଖିର ଲୁହକୁ ଯାଉଛି ପୋଛି
ମିତଣୀ ଲୋ
ଇଜ୍ଜତ ମହତ ଲାଗୁଛି ଡର
ଗୋଡ଼କୁ କାଢୁନି ଆଉ ମୁଁ ଘର
ମଦୁଆ ବାତରା ବେକାର ଯେତେ
ଜ୍ଞାନକୁ ହଜେଇ ପାଜିକୁ ସତେ
ମିତଣୀ ଲୋ
ଭାବୁଛି ଏବେ ମୁଁ କାହାର ହେବି
ବେଦିକୁ ଯିବିନା ଘରେ ମୁଁ ଥିବି
ଶୂନ୍ୟ ମୋ ଧାରଣା ପାଉନି କୂଳ
ଭାବୁଛି ଯାହା ମୁଁ ଶୈଶବ ମେଳ
ମିତଣୀ ଲୋ
ଅତୀତ ସପନେ ଭାଙ୍ଗୁଚି ନିଦ
ଭବିଷ୍ୟ ଅନ୍ଧାର ମନରେ ଖେଦ
ଶାସନ ଆଇନ୍ ହୁଗୁଳା ଲାଗେ
ଦେଶର ଉନ୍ନତି ଦିଶୁନି ବାଗେ
ମିତଣୀ ଲୋ
ଝିଅର ରୂପକୁ ତଉଲ ଗୁଣ
ଦୁନିଆ ରହନ୍ତା ଭାରତ ଟାଣ
ମନର ବେଦନା କହିଲି ଖୋଲି
ଜବାବ ଦେବୁଲୋ ମତେ ତୁ କାଲି
