Library
ମହାଗୌରୀ
ମହାଗୌରୀ
ଦୁର୍ଗା ମାତାଙ୍କର ଅଷ୍ଟମ ଶକତି
ନାମ ତାଙ୍କ ମହାଗୌରୀ
ଆଠ ବରଷର କନ୍ୟା ରୂପୀ ମାତା
ଗଉର ବର୍ଣ୍ଣ ତାଙ୍କରି ।
ଶିବଙ୍କୁ ପାଇବେ ପତି ରୂପେ ବୋଲି
କରିଲେ କଠୋର ତପ
ତପ ଆଚରଣ କରିବାରୁ ହେଲେ
କଳାକାଠର ସ୍ୱରୂପ ।
ପ୍ରସନ୍ନ ହୋଇଣ ସଦାଶିବ ଗଙ୍ଗାଜଳେ
ଧୋଇ ମାଜି ଦେଲେ
ଗୌର ବର୍ଣ୍ଣ ହେଲା ଦେବୀଙ୍କର ରୂପ
ମହାଗୌରୀ ବୋଲାଇଲେ ।
ଶ୍ୱେତ ବୃଷାରୂଢା ଶ୍ୱେତାମ୍ବରା ମାତା
ବିଦ୍ୟୁତ୍ ପ୍ରଭା ସମ କାନ୍ତି
ଚତୁର୍ଭୁଜା ଉର୍ଦ୍ଧ୍ଵ ଦକ୍ଷିଣ ହସ୍ତରେ
ଅଭୟ ସଦା ଦିଅନ୍ତି ।
ନିମ୍ନ ହସ୍ତେ ଥାଏ ତ୍ରିଶୂଳ ବାମ
ଉର୍ଦ୍ଧ୍ଵ କରେ ଡମ୍ବରୁ ଥାଏ
ନିମ୍ନ ବାମ କର ବରଦ ମୁଦ୍ରାରେ
ମାତାଙ୍କର ରହିଥାଏ ।
ଶାନ୍ତ ରୂପ ତାଙ୍କ ଦୁର୍ଗୋତ୍ସବ ବେଳେ
ଅଷ୍ଟମ ଦିବସ ଦିନ
ମହାଗୌରୀ ରୂପେ ପୂଜା ପାଇଥାନ୍ତି
ଏହାହିଁ ବିଧି ବିଧାନ ।
ସଦ୍ୟଫଳଦାୟୀ ଅମୋଘ ଶକତି
ମାତାଙ୍କ କୃପାରୁ ମିଳେ
ସକଳ କଳ୍ମଷ ପାତକ ବିନାଶେ
ଦୁଃଖ ଦୈନ୍ଯ ସବୁ ଟଳେ ।
ପବିତ୍ର ହୁଅଇ ଭକତ ତାଙ୍କର
ଲଭଇ ଅକ୍ଷୟ ପୁଣ୍ୟ
ଧ୍ୟାନ ସ୍ମରଣ ପୂଜନ ଆରାଧନା
ଦିଅଇ ସର୍ବ କଲ୍ୟାଣ ।
ସବୁ ଅସମ୍ଭବ ସମ୍ଭବ ହୁଅଇ
ମାତାଙ୍କର କୃପା ବଳେ
ଅସତ ବିନାଶ ହୁଏ ଭକତର
ସତ ପଥରେ ସେ ଚଳେ ।
