🌹💅ମହାବାହୁ ।💅🌹 💐🌹🙏🌹🥦

ଏତେ ଦୁଃଖ ମୋତେ ଦେଲୁ ମାହାବାହୁ

    ଶୁଖୁନୁ ମୋ ଆଖି ଲୁହ

ଏମିତି ଯନ୍ତ୍ରଣା ଭରିଛୁ ଜୀବନେ

     ସରୁନି ବି ତାର କୋହ ।

ଆଖିର ଆଗରେ ମରଣର ନଈ

     ଭରା ଅଛି ଜଉଘର

ଚଲାପଥ ଅଛି କଣ୍ଟାର ସବାର

    ବହେରେ ରକତ ଧାର ।

ତଥାପି ଚାଲିଛି ତୋର ଭରସାରେ

ଲଢୁଛି ଆଜି ମୁଁ ଦୁନିଆ ସାଥିରେ

     ଯାହା ହେବ ପଛେ ହେଉ ।

ଆହେ ପ୍ରଭୁ ମହାବାହୁ ।

ଯେ ଡାଳ ଧରିଲି ସେ ଡାଳ ଭାଙ୍ଗିଲୁ

     ଭରିଲୁ ଅଶାନ୍ତି ନିଆଁ 

ସେ ନିଆଁରେ ଜଳି ପାଉଁଶ ହୋଇଲା

    ମୋର ଏ ଖୁସି ଦୁନିଆ ।

ଦଦରା ନାଆକୁ ଜାଣି ମହାବାହୁ 

    ସାଗରରେ ମେଲି ଦେଲୁ

ଝଡର ତୋଫାନ ଆସିବାର ଦେଖି

    ହାତ ମୋର ଛାଡି ଦେଲୁ ।

ଭାବୁଛୁ ତୁ କି ମୁଁ ତୋତେ ଛାଡିବି

ତୋହରି ପାଖରୁ ଦୂରେଇଣ ଯିବି 

    ସେତିକି ଚାଲାକି ଥାଉ ।

ଆହେ ପ୍ରଭୁ ମହାବାହୁ ।

ଦିଗ ହଜା ହେଇ ଘୂରି ମୁଁ ବୁଲୁଛି

    ପଥ ଖୋଜି ପାଉ ନାହିଁ 

ଯେଉଁ ଆଡେ ଗଲେ ସିଆଡେ ଖାଲିରେ

     ଆଖିରେ ରହୁଛୁ ତୁହି ।

ତୋ ବିନା କେହି ନାହିଁ ମୋ ନିଜର

     ତୁ ପରା ଭରସା ମୋର

ମୋ ଆଶା ବିଶ୍ୱାସ ତୁ ମହାବାହୁ 

     ସାଥି ତୁ ଜନ୍ମ ଜନ୍ମର ।

ଯାହା ତୁ କରିବୁ ସବୁ ତୋର ଇଚ୍ଛା

ହେଲେ ଛାଡିବିନି ମୁଁ ତୋର ପିଛା

     ଝରୁ ପଛେ ମୋର ଲହୁ ।

ଆହେ ପ୍ରଭୁ ମହାବାହୁ ।

ଚାହିଁ ମୁଁ ନ ଥିଲି ତୋଳିବାକୁ ଘର

       ଦେଲୁରେ ସିନ୍ଦୂର ଗାର

ମିଛରେ ଭଣ୍ଡେଇ ସୁଖର ସଂସାର 

     ଭାଙ୍ଗି ଦେଲୁ ଶଙ୍ଖା ମୋର ।

ଉପରେ ଉପରେ ପାଣି ତୁ ସିଞ୍ଚିଣ

     ଭିତରେ କାଟିଲୁ ଚେର 

ଅଢେଇ ଦିନକୁ କରିଣ ତୁ ଖେଳା

     ଭରିଲୁ କଳଙ୍କ ଗାର ।

ଆଭ କିଛି ତୋତେ କହିବାର ନାହିଁ 

ବାକି କିଛି ଆଉ ରଖିନୁରେ ତୁହି 

    ପ୍ରଶ୍ନ କରିବୁନି ଆଉ ।

ସ୍ଥାନ ଦେବୁ ମହାବାହୁ ।