ରାମସେତୁ ନିର୍ମାଣ
ରାମସେତୁ ନିର୍ମାଣ
ଶୁଭେ ଭୟଙ୍କର ସେତୁର ଗର୍ଜନ
ତହିଁ ଉତ୍ସାହିତେ ସେତୁର ନିର୍ମାଣ !
ରାମ ରାମ ରାବ୍ କରୁଛି ଗୁଞ୍ଜନ
ଦେଖନ୍ତି ଆକାଶୁ ଧ୍ୟାନେ ଦେବଗଣ !
ପଥରେ ଅଙ୍କିତ ଶ୍ରୀରାମ ଶ୍ରୀରାମ
ଭାସୁଛି ସେହୁ ତ ହୋଇଣ ଉମଙ୍ଗ !
ସେତୁ ବନୁ ଅଛି ଅପୂର୍ବ ରୂପେଣ
ରାମସେତୁ ନାମେ ରହିଛି ପ୍ରମାଣ !
ମରିବ ରାବଣ ପାପର କାରଣ
ଚୋରି କଲା ନାରୀ ଲମ୍ପଟ ରାବଣ !
ପାହାଡ଼ ପଥର ଆଣନ୍ତି ବାନର
ପ୍ରଭୁଙ୍କ କାର୍ଯ୍ୟରେ ହୋଇଣ ତତ୍ପର !
ବିଶ୍ଵକର୍ମା ପୁତ୍ର ନଳ ନୀଳ ଦୁଇ
ନିର୍ମାଣ ସେତୁକୁ କଲେ ଦୁଇ ଭାଇ !
ବାନର ସୈନିକ ଆଣନ୍ତି ପଥର
ଯତ୍ନେ ଯୋଡୁଥାନ୍ତି ନଳ ନୀଳ ବୀର !
ନାହିଁ ଟି ବିଶ୍ରାମ କାର୍ଯ୍ୟେ ଅନୁକ୍ଷଣ
ରାମ ରାବ୍ ରାମ ଭକ୍ତିର ଶ୍ରବଣ !
ରାବଣକୁ ମାରି ଆଣିବେ ବୈଦେହୀ
ରାମ ନାମ ଶବ୍ଦେ କମ୍ପୁଛି ଏ ମହୀ !
ବସି ଦେଖୁଥାନ୍ତି ରାମ ଓ ଲକ୍ଷ୍ମଣ
ଅଛନ୍ତି ମିତ୍ର ସେ ସୁଗ୍ରୀବ ହେ ପୁଣ !
ଦିଅନ୍ତି ନିର୍ଦ୍ଦେଶ ବାନର ସେନାକୁ
ପଥର ପାହାଡ଼ ଆଣ ହେ ସେତୁକୁ !
ଆଣେ ହନୁମାନ ପାହାଡ଼କୁ ବୋହି
ଅଛି ଶକ୍ତି କା'ର ବର୍ଣ୍ଣିବାକୁ ଏହି !
ଅପୂର୍ବ ଏ ଦୃଶ୍ୟ ସେତୁର ନିର୍ମାଣେ
ନାମ ରାମସେତୁ ବର୍ଣ୍ଣିତ ପୁରାଣେ !
ଅଛି ବିଦ୍ୟମାନ ରହିଛି ପ୍ରମାଣ
ସୀତାଙ୍କ ଉଦ୍ଧାରେ ସେତୁର ନିର୍ମାଣ !
ଅତି ହିଁ ଛୋଟ ସେ ଗୁଣ୍ଡିଚା ମୂଷିକ
ତା'ର କାର୍ଯ୍ୟ ଦେଖି ସମସ୍ତେ ଅବାକ୍ !
ଜଳେ ବୁଡୁଥାଏ ବାଲି ଆଣୁଥାଏ
ପ୍ରଭୁଙ୍କ କାର୍ଯ୍ୟର ସହଭାଗୀ ହୁଏ !
ଦେଖିଣ ଶ୍ରୀରାମ ଆନନ୍ଦିତ ମନ
ତିନିଗାର ଖିଞ୍ଚି ଦେଲେ ଭଗବାନ !
ଗାର ତିନି ତହୁଁ ଝଲକି ଉଠିଲା
ବୋଲି ରାମ ଭକ୍ତ ଜଗତ ଜାଣିଲା !
ଜାମ୍ବବ ବାନର ସବୁ କର୍ମେ ଜ୍ଞାନୀ
ଜାଣେ ସବୁକଥା ଅଟଇ ବୈଜ୍ଞାନୀ !
ସେତୁର ନିର୍ମାଣେ ସେହୁ ତ ଅଗ୍ରଣୀ
ସବୁ କଥାକୁ ସେହୁ ଅଛି ଟି ଜାଣି !
ବାଳି ପୁତ୍ର ପରା ଅଙ୍ଗଦ ସେ ବୀର
କରେ ସେତୁ କାର୍ଯ୍ୟ କର୍ତ୍ତବ୍ୟେ ତତ୍ପର !
ଛାର ମୁଁ ଅଜ୍ଞାନୀ ବର୍ଣ୍ଣିବି କିପରି
କରି ଦେବ କ୍ଷମା ଦୋଷକୁ ନ ଧରି !