ପୂଜା ଫୁଲ

ପୂଜା ଫୁଲଟିଏ କର ମୋତେ ପ୍ରଭୁ

ପୂଜାରେ ତୁମ ଲାଗିବି 

କୋଟି ଜନମର ପୁଣ୍ୟ ହେବ ମୋର

ତୁମରି ଗୁଣ ଗାଇବି ।

ତୁମେ ମୋର ଆଶା ତୁମେ ମୋ ଭରସା

ହେ ପ୍ରଭୁ ରଙ୍ଗାଅଧର 

ପୂଜା ଫୁଲଟିଏ କର ମୋତେ ପ୍ରଭୁ

ମେଣ୍ଟୁ ଅରମାନ ମୋର ।

ଶିରରେ ଲାଗେ ବା ପାଦରେ ଲାଗେ ମୁଁ

ଅବା ଲାଗେ ନୈବେଦ୍ୟରେ

ପୂଜା ଫୁଲଟିଏ ହୋଇ ମୁଁ ଲାଗିଲେ

ଶ୍ରଦ୍ଧା ଭକତି ରୂପରେ ।

ହସିବି ମୁଁ ସିନା ଧନ୍ୟ ମୋ ଜୀବନ

ଲାଗିଲା ତୁମ ସେବାରେ 

ତୁମ କରୁଣାରୁ ଫୁଟିଛି ମୁଁ ଆଜି

ସେବୁଛି ତୁମ ପୟରେ ।

ହେ ମୋର ଠାକୁର ଶୁଣିବ ମୋ ଗୀର

ତୁମର ମୁଁ ତୁମେ ମୋର 

ଦୀନ ଅକିଞ୍ଚନ ଫୁଲଟିଏ ମୁହିଁ

ତୁମେ ମୋ ଜୀବନାଧାର ।

ଅଳପ ଆୟୂଷ ଲଭିଛି ମୁଁ ବିଭୁ

କରିବ ମୋତେ କରୁଣା

ପୂଜା ଫୁଲଟିଏ କରିଦେବ ମୋତେ

ପୂରିବ ମୋର ବାସନା ।

ପୂରିଲେ ବାସନା ସମର୍ପିତ ହେଲେ

ପ୍ରଭୁ ମୁଁ ତୁମରି ପାଶେ

ତୁଟିଯିବ ମୋର ସକଳ ବନ୍ଧନ

ରହିବି ମନ ହରଷେ ।

ଭାବ ବିନୋଦିଆ ମୋ କଳା କହ୍ନେଇ

କିଛି ଲୋଡା ନାହିଁ ମୋର

ଘେନ ନିବେଦନ ତୁମ ପାଇଁ ମୋତେ

ପୂଜା ଫୁଲଟିଏ କର ।