ମହା ଜାଗତିକ ପ୍ରୀତି

ବିମୁଗ୍ଧ ପରାଣ ମଧୁ ଗୀତିକାରେ 

ବିଭୋରିତ ଆତ୍ମା ପକ୍ଷୀ

କେମିତି କେଜାଣି ଭିନ୍ନ ଅନୁଭବ

ପ୍ରଭୁ ତୁମେ ଏକା ସାକ୍ଷୀ l

ତୁମେ ଅଛ ବୋଲି ଦୁନିଆଟା ଖାଲି

ଭାବମୟ ଲାଗେ ମୋତେ

ତୁମ ଛବି ଦେଖି ସୁଷମା ନିରେଖି

ବିମୋହିତ ହୁଏ ସତେ l

ତୁମ ହାତ ଗଢ଼ା ଏ ବିଶ୍ୱ ପସରା

ମହା ଜାଗତିକ ପ୍ରୀତି

କି ସୁନ୍ଦର ଶୋଭା ଲକ୍ଷେ ବର୍ଣ୍ଣ ବିଭା

ଦେଖୁ ଏ ଧରାରେ ନିତି l

ପାଦପେ ଭରିଛ ମିଠାମିଠା ଫଳ

ସବୁଜିମା ଶୋଭା ରାଜି

କଅଁଳ ପଲ୍ଲବେ ପୁଲକ ଖେଳାଇ

କୁସୁମ ଦେଇଛ ସୃଜି l

ସୁଗନ୍ଧ ଦେଇଛ ମଧୁର ମଳୟେ

ମଧୁ ମକ୍ଷିକାର ଗୀତ

ମଧୁକର କଣ୍ଠେ ମଧୁର ଗୁଞ୍ଜନ

ପ୍ରକୃତି ଗାଏ ସଙ୍ଗୀତ l

ସାଗର ବକ୍ଷରେ ସୁଉଚ୍ଚ ତରଙ୍ଗ

ନଦୀ ନିର୍ଝରିଣୀ ସଙ୍ଗ

ନିର୍ଜନ ବେଳାରେ ନୀଳ ନୀଳ ସ୍ମୃତି

କେବେ ହୁଏ ସ୍ବପ୍ନ ଭଙ୍ଗ l

କଳ୍ପନାର କଳା ଲିଭି ଲିଭି ଆସେ

ତୁମ ଅନୁଭବ ପାଶେ

ତୁମେ ଅଛ ବୋଲି ମୋ ହୃଦ ମନ୍ଦିରେ

ଲୁଚି ଲୁଚି ମୁହିଁ ହସେ l