Library
ମେଲାଣି
ମେଲାଣି
ମାଆ ଦଶଭୁଜା ଆସିଲେ ଧରାକୁ
ଧରା ହେଲା ମୁଖରିତ
ଗାଁ ଠୁ ସହର ଏ ସାରା ସଂସାର
ଲୋକେ ହେଲେ ପୁଲକିତ ।
ଚାରିଦିନ ଲାଗି ଆସିଥିଲେ ମାଆ
ମଣ୍ଡପେ ପାଇଲେ ପୂଜା
ରଙ୍ଗ ବେରଙ୍ଗର ତୋରଣ ଲାଗିଲା
ବାଜିଲା ବିବିଧ ବାଜା ।
ବେଦମନ୍ତ୍ରେ ପୂଜା ହେଲା ମାଆଙ୍କର
ଘଣ୍ଟ ଘଣ୍ଟା ଶଙ୍ଖ ବାଜି
ବଳିଭୋଜା ଖାଇ ପ୍ରୀତା ହେଲେ ମାଆ
ମେଲାଣି ନେବେ ସେ ଆଜି ।
ସରଗରୁ ଆସି ଧରାକୁ ସରଗ
କରିଥିଲେ ଚାରିଦିନ
ଗୁହାରି ଶୁଣିଲେ ଭକତ ଜନର
ଦେଲେ ତାଙ୍କୁ ବରଦାନ ।
ବରଦା କଲ୍ୟାଣୀ ଜଗତ ଜନନୀ
ହୋଇବେ ଆଜି ମେଲାଣି
ସୁଖରେ ଦୁଃଖରେ ସୁମରିଲେ ତାଙ୍କୁ
ହୋଇବେ ବରଦାୟିନୀ ।
ହେଲାଣି ରୋଷଣୀ ବାଜା ବାଜିଲାଣି
ମାଆ ହୋଇବେ ମେଲାଣି
ଆସରେ ଭକତ ନକର ତୁ ଡେରି
ମାଆଙ୍କୁ ଦେବା ମେଲାଣି ।
ଆଗୋ ମାଆ ମୋର ଦୋଷ କ୍ଷମାକର
ବାଳୁତ ସନ୍ତାନ ତୋର
ଶତ ଅପରାଧ କରିଅଛି ମୁହିଁ
ଦୋଷ ମୋହର ନଧର ।
କୁପୁତ୍ର ମୁଁ ତୋର ସୁମାତା ତୁ ମୋର
ଜନମେ ଜନମେ ତୋର
ସେବା ଦେଇ ତୋର ଅପରାଧ ମୋର
ଜନନୀ ଗୋ କ୍ଷମାକର ।
ଆଗୋ କୃପାମୟୀ ମୋ ପ୍ରିୟ ଜନନୀ
ଆର ବରଷକୁ ପୁଣି
ରହିଥିବି ଚାହିଁ ତୋର ପଦ ଧ୍ୟାୟି
ଦେଉଛି ତୋତେ ମେଲାଣି ।
