ମୌସୁମୀ ଯାଇନି ଭୁଲି

ବରଷେ ବରଷେ ଆସଇ ମୌସୁମୀ

ଆମ ଓଡିଶାକୁ ବହି ।

ବିସ୍ତାରି ପ୍ରଭାବ ଦିଏ ଅନୁଭବ

ମହକାଇ ଦିଏ ମହୀ ।୧।

ତପତେ ତାପିତ ଧରା ହୁଏ ସିକ୍ତ

ମୌସୁମୀ ପରଶ ନେଇ ।

ବରଷଇ ଘନ ନଦୀ ପୁଷ୍କରିଣୀ

ଫୁଲେ ଘନରସ ପାଇ ।୨।

କେବେ ସୌଦାମିନୀ ଚମକେ

ଆକାଶେ କେବେ ବଜ୍ର ଘଡଘଡି ।

ମୌସୁମୀ ବରଷା ସଙ୍ଗେ ମିଶି ଆସି

କର୍ଣ୍ଣକୁହରରେ ପଡି  ।୩।

ଦୁଲୁକାଏ ଛାତି ଆଣଇ ବିପତ୍ତି

କେବେ ହରେ କାର ପ୍ରାଣ ।

ମୌସୁମୀ ଆସିଲେ ସର୍ବେ ଆନନ୍ଦିିତ

ପୁଲକିତ ତନୁ ମନ ।୪।

ମୌସୁମୀ ଆସିଲେ ହସେ ଚାଷୀ ଭାଇ

ବିଲରେ କରିବ କାମ ।

ବିନା ମୌସୁମୀରେ ଫସଲ ହେବ କି

ବୁଦ୍ଧି ହୋଇଯାଏ ବାମ ।୫।

ଅଙ୍କୁରିତ ହୁଏ ବୀଜ ମୌସୁମୀର

ପରଶ ଯେବେ ଲଭଇ ।

କି ସୁନ୍ଦର ଦିଶେ ମୟୂର ନର୍ତ୍ତନ

ଦୃଶ୍ଯ ଚିତ୍ତ ମୋହୁଥାଇ ।୬।

ଚାତକ ପକ୍ଷୀଟି ଚାହିଁ ବସିଅଛି

ମୌସୁମୀ ଆସିବ କେବେ ।

ମୌସୁମୀ ଯାଇନି ଭୁଲି ଏସବୁକୁ

ଆସିବ ସେ ଏବେ ଏବେ  ।୭।