ଲୁଚେଇବି ନାହିଁ ଯାହା ଲୁଚିଥିଲା

ତୁମକୁ କିଛି ବି ଲୁଚାଇବି ନାହିଁ 

ଯାହା ରହିଛି ଅଜଣା

ଜୀବନରେ ଯାହା କିଛି ଘଟିଗଲା

ପ୍ରାୟ ଥିଲା ଜଣା ଶୁଣା 

ସେହି ଅଜଣା ରହସ୍ୟ ଆଢ଼ୁଆଳେ

ଦୁହିଁଙ୍କର ନୀରବତା

ସବୁ କିଛି ହେଲା ଓଲଟ ପାଲଟ

ବଦଳିଲା ଆମ ରାସ୍ତା

ମେଳା ଭିଡରୁ ଆମ ଦୁହେଁ ଦୁହିଁଙ୍କୁ

ଯେବେ ଥିଲୁ ନିରୋଳା ରେ

ବୋଧେ କାହାର ନଜର ରହିଥିଲା

ଆମ ମିଳନ ପଥରେ

ଯେବେ ମେଳା ଦେଖି ହେଲେ ଘର ମୁହାଁ 

ଚର୍ଚ୍ଚା ହେଲା ଘରେ ଘରେ

ବାଧା ସୃଷ୍ଟି ହେଲା ମିଳନ ପଥରେ

ଅଙ୍କୁଶ ଲାଗିଲା ଧିରେ 

ନୀରବି ରହିଲେ ପରଷ୍ପର ଠାରୁ

ଯଦିଓ ହୁଅଇ ଦେଖା

କିଛି ବି କହିବା ତ ଦୂରର କଥା

ଦେଖି ହେଲ ଅଣ ଦେଖା

ସାଙ୍ଗ ସାଥି ମେଳେ କହି ତୁମ କଥା

ଖୋଜିଲି କିଛି ଉପାୟ 

ଲୁଚେଇ ଚିଠି ବି ଦେଇଛି ତୁମକୁ

ହେବାକୁ ମିଳନ ଥୟ

ସବୁ ଚେଷ୍ଟା ଯେବେ ହୋଇଲା ବିଫଳ

ନୀରବେ ସହି ଯନ୍ତ୍ରଣା

ତୁମ ସହ ଦେଖା ଆଉ କଥା ବିନା

ପ୍ରାୟ ହେଲି ଆନ ମନା 

ହୃଦୟ ମୋ ଭାଙ୍ଗି ଗଲା ପରେ ପରେ

ମଉଳି ଗଲା ମୋ ଆଶା

ବାଟ ଭାଙ୍ଗି ଗଲ ଅନ୍ୟ ହାତ ଧରି

ତୁଟିଲା ଆଶା ଭରସା

ସାଥୀ ହୋଇ ଜୀବନର ଚଲାପଥେ

କଥା ଥିଲା ଚାଲିବାକୁ

ସାଥୀ ବିନା ସବୁ ଅପ୍ରିୟ ଲାଗିଲା

ନିନ୍ଦିଲି ନିଜେ ନିଜକୁ

ଆଜି ସୁଦ୍ଧା ନିଜେ ନିନ୍ଦୁଛି ନିଜକୁ 

କିମ୍ପା ରହି ନୀରବରେ

ସହ୍ୟ କରୁଅଛି ସେ' ବିରହ ଯନ୍ତ୍ରଣା

ପ୍ରାୟ ପ୍ରତି ମୁହୂର୍ତ୍ତରେ

ଭାଷାରେ ବର୍ଣ୍ଣନା ଦୁରୂହ ବ୍ୟାପାର

ଶବ୍ଦର ପ୍ରାୟ ଅଭାବ

ସ୍ମୃତି ବଞ୍ଚାଇ ରଖିଛି ଏ ଜୀବନ 

ବୋଧେ ରହିଛି ରହିବ!