ଲାଗିଲା ଝିଅର ରାଣ

ଆମରି ଝିଅର   କଳ୍ପନାର ପାଦେ

ସ୍ୱପ୍ନର ନୂପୁର ବାଜେ

ଏହି ଆଶା ତା'ର  ଅଧୁରା ରହିଲେ

କାହାକୁ କହିବା ଲାଜେ ?

ଲାଳନପାଳନ   କରିଛେ ଏଯାଏଁ

ଅଭାବରେ ସିନା ରହି

ବାପା ତା'ର ଜଣେ ମଦୁଆ ଜାଣିଲେ

ପାରିବ କି ସିଏ ସହି !

କେମିତି ଭୁଲିବି  ମୋର ବାପା ମଧ୍ୟ

ପିଉଥିଲେ ବୋଲି ମଦ

ଘରୁ ବାହାରିଲେ  ଶୁଣୁଥିଲି ଯେତେ

ଘୃଣ୍ୟ ତିରସ୍କାର ପଦ ।

ପର୍ବପର୍ବାଣୀରେ ଆବଶ୍ୟକତା ମୋ'

ପୂରଣ କରିବା କଥା

ପ୍ରତିଥର ଶୁଣେ  ବଦଳେନି କେବେ

ଅଭାବେ ଚଳିବା ପ୍ରଥା ।

ଘର ପ୍ରତି ତାଙ୍କ  ନିଘା ବି ନଥାଏ

ପିଇଲେ ଖେଳନ୍ତି ଜୁଆ

ଏକା ପୋଷାକରେ ବର୍ଷ ବିତେ ମୋର

ଧୋଇଲେ ଭାବଇ ନୂଆ ।

ଅନ୍ୟ କେହି ଝିଅ  ନିଜ ବାପା ପାଇଁ

ଗର୍ବ କରି ଯେବେ କହେ

ଆଖିର ଲୁହକୁ  ଆଖିରେ ଜକେଇ

ଉଦାସିନୀ ଭଳି ରହେ ।

ସୁଧାରିବା ପାଇଁ  ହାତ ପାଦ ଧରି

କରୁଥିଲୁ ସିନା ଅଳି

ଲୁହରେ ଭସାଇ  ଚାଲିଗଲେ ତାଙ୍କ

କଲିଜା ଯିବାରୁ ଜଳି ।

ତୁମେ ତାଙ୍କ ଭଳି  ଜଳାଇ ନିଜକୁ

ନାଶୁଅଛ ତିଳେ ତିଳେ

ଭବିଷ୍ୟେ ଅନାଇ  ପାଞ୍ଚିଛ କି ଥରେ

କିସ ଯେ' ଏଥିରୁ ମିଳେ ।

ମନ ଦୃଢ କରି   ମଦ ଛାଡିଦିଅ

ଲାଗିଲା ଝିଅର ରାଣ

ସେହି ପଇସାରେ ସ୍ୱାସ୍ଥ୍ୟପ୍ରଦ ଖାଦ୍ୟ

ନିୟମିତ ପଛେ ଆଣ ।