କ୍ୟାଲେଣ୍ଡର
କ୍ୟାଲେଣ୍ଡର
ନୂଆବର୍ଷ ପରା ନଆସୁଣୁ ଭାଇ
କ୍ୟାଲେଣ୍ଡର ଆସିଯାଏ
କୌଣସି ଜିନିଷ କିଣିଲେ ସେଥିରେ
କ୍ୟାଲେଣ୍ଡର ମିଳିଥାଏ ।
ଲୁଗା ଦୋକାନୀ ବା ସିମେଣ୍ଟ ଦୋକାନୀ
ନିଜ ଦୋକାନ ନାମରେ
କ୍ୟାଲେଣ୍ଡର ପରା ପ୍ରସ୍ତୁତ କରନ୍ତି
ବାଣ୍ଟନ୍ତି ନୂଆବର୍ଷରେ ।
ନୂତନ ବରଷ ଆସିଲେ ଯେକେହି
କିଣି ନୂଆ କ୍ୟାଲେଣ୍ଡର
ଘରର ଗୋଟିଏ କୋଣରେ ଟାଙ୍ଗନ୍ତି
ଦେଖିଥା'ନ୍ତି ଓଷାବାର ।
ବାର ଓ ତାରିଖ ଅବା ଛୁଟି ଦିନ
ଦେଖିଥାଉ କ୍ୟାଲେଣ୍ଡରୁ
ବାରମାସ ନେଇ କ୍ୟାଲେଣ୍ଡର ସୃଷ୍ଟି
ଦେଖି ନିତ୍ୟ କାର୍ଯ୍ୟ କରୁ ।
ଶିକ୍ଷାନୁଷ୍ଠାନ ଓ ଅଫିସ୍ ବା ଘର
ପ୍ରତିଟି ସ୍ଥାନରେ ଭାଇ
ଆବଶ୍ୟକ ଯୋଗୁଁ ପ୍ରାୟତଃ ସବୁଠି
କ୍ୟାଲେଣ୍ଡର ଝୁଲୁଥାଇ ।
କ୍ୟାଲେଣ୍ଡର ଯେବେ ଦେଖୁ ପୁରାତନ
ଦିନ କିଛି ମନେ ପଡ଼େ
କିଛି ମିଠା କିଛି ଖଟା ସ୍ମୃତି ଭାବି
ଆଖିରୁ ଲୋତକ ଗଡ଼େ ।
ନୂଆ କ୍ୟାଲେଣ୍ଡର ହୁଅଇ ପୁରୁଣା
ସଂସାର ନିୟମ ଇଏ
ସମୟ କାହାକୁ ଅପେକ୍ଷା କରେନି
ଦିନୁଦିନ ଗଡ଼ିଯାଏ ।
ଆଖିବୁଜି ଆଖି ଖୋଲିଲା ବେଳକୁ
କାଲି ଶିଶୁ ଆଜି ବୁଢ଼ା
ପ୍ରତିଟି ମୂହୁର୍ତ୍ତ ଆନନ୍ଦରେ କାଟ
ଯୌବନ ଅଣଲେଉଟା ।