କୁନି କାଉଡ଼ିଆ

ବାପା ନାହିଁ ମୋର ରୋଗୀଣା ମାଆର

ଆରୋଗ୍ୟ କାମନା ପାଇଁ

ଯାଉଛି ଏଥର ନେଇ ପାଣି ଭାର

କୁନି କାଉଡ଼ିଆ ହୋଇ ।

ଗେରୁଆ ବସନ ଦେହରେ ମୋହର

କାନ୍ଧେ ପରା କୁନି ଭାର

କୁନି କୁନି ପାଦେ କାଉଡ଼ିଙ୍କ ସାଥେ

ଚାଲେ ଡାକି ମହେଶ୍ଵର ।

ସଂସାରେ ଯାହାର ନଥାଏ କେହିରେ

ତାହାର ସାହା ଦଇବ

ଅରକ୍ଷିତ ମୁହିଁ ମାନସିକ ମୋର

ପୂରଣ କରିବେ ଶିବ |

ଶ୍ରାବଣର ବାରି ପଡ଼େ ପଥେ ଝରି

ମାରେ ପୁଣି ଘଡ଼ଘଡ଼ି

ଲକ୍ଷ୍ୟରୁ କଦାପି ବିଚ୍ୟୁତ ନହୋଇ

ଚାଲେ ମୁଁ ଆଗକୁ ମାଡ଼ି ।

ଗରଭ ଯନ୍ତ୍ରଣା ସହି ଯେଉଁ ମାଆ

ଦୁନିଆକୁ ଆଣିଥାଏ

ସେହି ମାଆ ସୁସ୍ଥ ହେବା ପାଇଁ ଏହି

ପଥବାଧା କିଛି ନୁହେଁ ।

ପରିଶ୍ରମ କେବେ ହୁଏ ନାହିଁ ବୃଥା

କର୍ମ ଘେନି ମିଳେ ଫଳ

କଷ୍ଟ କଲେ ପରା ମିଳିଥା'ନ୍ତି କୃଷ୍ଣ

ହୁଏନି କେବେ ନିଷ୍ଫଳ ।

ମାରିଲେ ମାରିବେ ପ୍ରଭୁ ମହାଦେବ

ତାରିଲେ ତାରିବେ ସିଏ

ତାଙ୍କ କରୁଣାରେ ମଲା ଗଛେ ପୁଣି

ପତର କଅଁଳି ଯାଏ ।

ଜଟାରୁ ତାଙ୍କର ବହେ ଗଙ୍ଗାଧାର

ଶିରେ ଚନ୍ଦ୍ର ପାଏ ଶୋଭା

ବାଘଛାଲ ପିନ୍ଧି ଧରି ସେ ତ୍ରିଶୁଳ

ଦିଶିଥା'ନ୍ତି ମନଲୋଭା ।

ଖାଲି ହାତେ ଯିଏ ଭେଟେ ଶଙ୍କରଙ୍କୁ

ଫେରେ ନିଶ୍ଚେ ପାଇ ବର 

ଜଳ ଢାଳି ମୁହିଁ ଜଣାଇବି ଦୁଃଖ

ମୋ ଦୁଃଖ ଶୁଣିବେ ହର ।