କୁମାର ପୂର୍ଣ୍ଣିମା
କୁମାର ପୂର୍ଣ୍ଣିମା
ଖୁବ୍ ସୁନ୍ଦର ଗୋଲଗାଲ
କୁମାର ପୂର୍ଣ୍ଣିମା ଜହ୍ନ
ଆକାଶରେ ଦିଶଇ ଉଜ୍ଜଳ,
ରୂପେଲି ଜୋଛନା କରେ
କାଉଁରୀ କିମିଆ
ମନ ହୁଏ ଛନ୍ନ ଛନ୍ନ
ଜାଳିଦିଏ ମିଠା ମିଠା ନିଆଁ ।
ଜହ୍ନି ଫୁଲ ଠୋ ଠା
କଇଁଫୁଲ ହସ ଫୁଟେ
ପ୍ରିୟ ପ୍ରିୟା ଓଷ୍ଠଧାରେ,
ଗାଁ ଦାଣ୍ଡ ବୃନ୍ଦାବତୀ ଚଉଁରା ମୂଳରେ
ହୁଏ ଚାନ୍ଦ ବନ୍ଦାପନା
ଝରେ ସମବେତ ଗୀତ
ସ୍ୱର ସୁମଧୁରେ ।
ସମୁଦ୍ରରେ ଉଠେ ଢେଉ
ନୃତ୍ୟ ଗୀତ ନାରଙ୍ଗୀ ପୂଚିରେ
ଦଶଦିଶ ଉତ୍ସବ ମୁଖର
ଉଲ୍ଲସେ ପ୍ରକୃତି ପ୍ରାଣ
ସୁକୁମାରୀ ମନ ଆନମନା
ମହମହ ବାସେ ଫୁଲ
ବଉଳର ବାସ୍ନା ।
ଜହ୍ନର ଶୀତଳ ସ୍ପର୍ଶେ
ଜଡପିଣ୍ଡେ ଜାଗେ ଶିହରଣ,
ଚହଟେ ବାସ ଚନ୍ଦନ
କାୟାଛାୟା ବିମ୍ବ ପ୍ରତିବିମ୍ବ
ମନତଳେ ଉଙ୍କି ମାରେ
ସବୁଜ ସୁନ୍ଦର ସ୍ୱପ୍ନ
ସଞ୍ଚରନ୍ତି ଭାବାବେଗେ ସୁକୁମାର
ଦିବ୍ୟରୂପ ଲୀଳାମୟ କୃଷ୍ଣ ।
ଜୀବନର ଛାୟାପଥେ
ଜହ୍ନ କେବେ ଭ୍ରମିଯାଏ ରାସ୍ତା
ଲୁଚେ କଳାବାଦଲ ଉହାଡେ
ମୁହଁ ତାର ଦିଶେ ଧୂଆଁ
ଜୋଛନା ତା ଲାଗେ ପ୍ରବଞ୍ଚନା
ଖାଲି ମିଛ ମାୟା
ଲାଗେ ପାଣିଚିଆ ମିଠା
କଟୁ ତିକ୍ତ ଜୀବନଟା
ଭାରି ପିତା ପିତା ।
ନିଆରା ଆଲୋକ ଗତି
ସଳଖ ସୁଗୁଣ,
ସେବା ଭକ୍ତି ତ୍ୟାଗ ସମର୍ପଣେ
କେବେ କେବେ ଜହ୍ନ ଦିଶେ
ଭାରି ତୋଫା
ମଧୁମୟ ପ୍ରେମ ସମୁଜ୍ଜ୍ୱଳ ।