ତୁମକୁ ନେଇ ମୋ କବିତା
ତୁମକୁ ନେଇ ମୋ କବିତା
ସହରର ସବୁ ବତୀ ଲିଭିଗଲା ପରେ
ତୁମେ ଆସ ଲୁଚି ଲୁଚି ଅମା ଅନ୍ଧକାରେ
ମିଠା ମିଠା କଥା କୁହ
ଖିଲି ଖିଲି ହସି ଦିଅ
ଧିରେ ଛୁଇଁ ଦେଇ ପୁଣି ଚାଲିଯାଅ ଦୂରେ
ସହରର ସବୁ ବତୀ ଲିଭିଗଲା ପରେ ।
ରାତିରେ ମୁଁ ଏକା ଏକା ଶୋଇଗଲା ପରେ
ତୁମେ ଆସ ଚୁପି ଚୁପି ମିଛ ସପନରେ
ସତ ସତ ଲାଗୁଥାଏ
ସବୁକିଛି ଭୁଲିଯାଏ
ଆଖି ଯେବେ ଖୋଲେ ତୁମେ ନ ଥାଅ ପାଖରେ
ସହରର ସବୁ ବତୀ ଲିଭିଗଲା ପରେ ।
ନିଦ ମୋର ଭାଙ୍ଗିଦେଇ ଚାଲିଗଲା ପରେ
ତୁମ ମୁହଁ ଦିଶେ ଖାଲି ମୋ ଚାରି କାନ୍ଥରେ
କଲମକୁ ତୂଳୀ ଭାବି
ଆଙ୍କିଦିଏ ତୁମ ଛବି
କବିତାଟେ ହେଇଯାଏ କାଗଜ ଉପରେ
ସହରର ସବୁ ବତୀ ଲିଭିଗଲା ପରେ ।