କୋଟିଏ ଗୁହାରୀ ଶୁଣିନ ହେ ହରି

କୋଟିଏ ଗୁହାରି  ଶୁଣିନ ହେ ହରି

   ଗୋଟିଏ ଶୁଣିବା ହେଉ

ତୋ ବଡ଼ଦାଣ୍ଡରେ  ରଥଚକ ତଳେ

   ମୋ ଜୀବନ ଚାଲିଯାଉ ।

ଚାହିଁଥିବି ତୋର   ଚକା ନୟନକୁ

   ବହୁଥିବ ନେତ୍ରୁ ନୀର

କାଳିଆ କାଳିଆ   ତୁଣ୍ଡ ଘୋଷୁଥିବ

    ତ୍ରାହି କର ତ୍ରାହି କର ।

ଛଟପଟ ହୋଇ   ଗଡ଼ୁଥିବି ତହିଁ

   ବଡ଼ ଦେଉଳକୁ ଚାହିଁ

ଆଖିକୁ ତରାଟି   ଯିବ ପ୍ରାଣପକ୍ଷୀ

   ତୋ ପଦ ପିଞ୍ଜରେ ଧାଇଁ ।

ମୋ ଭଳି ପତିତ   ହେଉ ପ୍ରାଣପାତ

   ପତିତପାବନ ତଳେ

ନନ୍ଦିଘୋଷ ରଥ   ଘର୍ଘର ଶବଦ

    ଶଙ୍ଖ ଘଣ୍ଟା ତାଳେ ତାଳେ ।

ତୋ ଦେହ ତୁଳସୀ  କର୍ପୁର ସୁବାସ

    ଧୂପ ଗନ୍ଧ ମହ ମହ

ପବନେ ସଞ୍ଚରି  ମୋ ଦେହରେ ଖେଳି

   ଝାଡ଼ିଦେବ ପାପଚୟ ।

ଦଳିଦେବେ ମୋତେ  ତୋର ଭକ୍ତ କେତେ

  କାନ୍ଧେଇକି ନେବେ ଥୋକେ

ତୋ ସ୍ୱର୍ଗ ଦୁଆରେ   ଜାଳିବେ ଚିତାରେ

    ଏ ଭାଗ୍ୟ ମିଳିବ ସତେ ।

ହେଲେହେଁ ପାତକୀ  ଯମଦୂତେ ଆସି

    ନେବେ ନାହିଁ ସାହା ମୋର

ତୋର ବିଷ୍ଣୁଦୂତେ  ଆସିବେ ପ୍ରତ୍ୟକ୍ଷେ

    ନେବେ ବଇକୁଣ୍ଠ ପୁର ।

କୋଟି ଜନ୍ମ ତୀର୍ଥ  ଫଳ ହେବ ପ୍ରାପ୍ତ

    ଶ୍ରୀକ୍ଷେତ୍ରେ ଗଲେ ଜୀବନ

ଏତିକି ଗୁହାରି   ମଞ୍ଜୁର କର ହେ

   ଜଗା କରେ ନିବେଦନ ।