ମାନଭଞ୍ଜନ
ମାନଭଞ୍ଜନ
ଆସିଛି ଆଜି ମୁଁ ତୁମ ନୀଳାଚଳ ଗଳି
ସଙ୍ଗେ ଆଣିଛି ମିଠା, ରସଗୋଲା କିଣି
ଶୁଣ ତ ମୋର ଏଇ ଟିକିଏ ଅଳି ।
କଥା ବି ଦେଉଛି,
ଦେଖ କାନ ବି ଧରୁଛି
ହେବିନି ମୁଁ ଆଉ ଆଗଭଳି ।
ଖାଉଛି ମୁଁ ରାଣ, ମାନିବି ମୁଁ କଥା
ଆଉ କରିବିନି ଟିକେ ବି କଳି ।
କାହିଁ କେବେଠୁ
ହଁ କାହିଁ କେବେଠୁ
ଦେଇଛି ପକାଇ ଇର୍ଷା, ଲୋଭ
ଆଉ ମୋ ରାଗକୁ ବି ବଳି।
କରିଛି ପୋଡ଼ି ଭସ୍ମ
ସଂସାରେ ଥିବା ଯେତେ ମୋହ
ଆଉ ମାୟାକୁ ଜାଳି ।
ଟିକେ ଦେଖ ଆଜି
କେମିତି ମନରୁ
ଦେଇଛି ମୁଁ ଧୋଇ
ଅତୀତର ସେଇ କାଳି ।
ଆଉ ଛଡେଇଛି ପୋଛି
ଥିଲା ଯେତେ ପାପର ମଳି ।
ଆସିଛି ମୁଁ ଆଜି
ମୁଖେ ଟିକା ଚନ୍ଦନ ବୋଳି ।
ହୃଦୟରୁ କାଢି, ଗୋଟି ଗୋଟି କରି ଗୁନ୍ଥି
ଆଣିଛି ମୋ ଦୁଇ ହାତେ ବାନ୍ଧି
ପ୍ରେମ ହାର ସହ ବନ୍ଧନର ମାଳି ।
କଥା ବି ଦେଉଛି,
ଦେଖ କାନ ବି ଧରୁଛି
ହେବିନି ମୁଁ ଆଉ ଆଗଭଳି ।
ଖାଉଛି ମୁଁ ରାଣ, ମାନିବି ମୁଁ କଥା
ଆଉ କରିବିନି ଟିକେ ବି କଳି ।
ନୁହେଁ ସେତିକି, ଆଉ ବି ଅଛି
ଦୂର ଜଙ୍ଗଲ ପାହାଡ଼ରୁ ଚଢି,
ତୁମେ ଆସିବ ବୋଲି ଜାଣି ।
ଦେଖ ଗୋସାଇଁ
ଆଣି ସଜେଇଛି ଏଇଠି ପାରି
ପଦ୍ମ, ପାରିଜାତ, ଟଗର ଭଳି
ଯେତେ ଥିଲା ଫୁଲ ସବୁକୁ ତୋଳି ।
ଧରି ଆଣିଛି ହାତକୁ ଖୋଲି
ଦେହ, ମନ ଆଉ ମାନସରେ ଭରି ।
କେବଳ ତୁମ ପାଇଁ ଭକ୍ତିଭାବ ଭରା
ଏଇ ମୋର ଟିକିଟିଏ ଥାଳି ।
ତୁମ ଇଛା
କହୁଛ ଯଦି କୁହ, ଦେଉଛ ଯଦି ଦିଅ
ମନଇଛା କରି ଆକଟ ଆଉ ଗାଳି ।
ହେଲେ ଶୁଣିଯାଅ ଟିକେ
ବୁଲି ଚାହଁ ମୋତେ
ତଥାପି ମୁଁ କରୁଛି କେବଳ
ଏଇ ଗୋଟିଏ ଅଳି ।
ଚାଲିଆସନା ଥରେ ଡେଇଁ
ନୀଳାଚଳ, ଶ୍ରୀକ୍ଷେତ୍ର ଆଉ
ବଡ଼ଦାଣ୍ଡର ସେଇ ଧୂଳି ।
ମାଡିଆସନା ଥରେ ନନ୍ଦିଘୋଷ ଧରି
ମୋ ଘର, ଆମ ଦୁଆର ଆଉ ଗାଁ ଗଳି ।