କଳଙ୍କିନୀ

କାନ୍ଦି କହୁଥାଏ କଳଙ୍କିନୀ ଆଜି

ଉତ୍ତର ଯେ କେହିଦିଅ

ଦୁନିଆ ଆଗରେ କଳଙ୍କିନୀ ମତେ

କିଏ ସଜେଇଲା କୁହ ।

ସଜ କଢି ପରି ଫୁଟୁଥିଲି ମୁଁହି

ସମାଜ ଯେ ଦେଲା ଦଳି

ନିଜ ସୁଖ ପାଇଁ କିଛି ଜଣ ମୋର

ଜୀବନକୁ ଦେଲେ ବଳି ।

ଖାଇଗଲେ ମୋର କଞ୍ଚା ମାଂସ ସବୁ

ଖୁସିରେ ତ ଚାଲିଗଲେ

କେବେ ବୁଲିକରି ଚିନ୍ତା କରିଛନ୍ତି

କେଉଁ ନାମ ଦେଇଗଲେ ।

ହଁ ହଁ ମୁଁହିଁ କଳଙ୍କିନୀ ଆଜି

ସମାଜରେ ହୋଇଅଛି

ନାରୀ ମାଂସ ଲୋଭୀ ମଣିଷଙ୍କ ପାଇଁ

ସବୁ ଯେ ବିକି ଦେଇଛି ।

ରାତି ଅନ୍ଧକାରେ ଜୀବନ ସଳିତା

ନିଆଁରେ ତ ଜାଳିଦେଲ

ନିଜ ଖୁସି ତୁମେ ପାଇଗଲା ପରେ

ଖୁସିରେ ତ ଚାଲିଗଲ ।

ଛିଣ୍ଡେଇ ଆଣିଲ ଅଗଣାରୁ ମତେ

ପାଦରେ ବି ଦଳିଦେଲ

ନଖର ଆଘାତେ ପାଖୁଡାକୁ ମୋର

ଗୋଟେ ଗୋଟେ ଛିଣ୍ଡେଇଲ ।

ସେହି ସମୟରେ ମଣିଷ ପଣିଆ

କେଉଁଆଡ଼େ ଯାଇଥିଲା

ଆଜି ଯେତେବେଳେ ବାସ ସରିଗଲା

କଳଙ୍କିନୀ ହୋଇଗଲା ।

କିଏ ଲେଖିଦେଲା ମଥାରେ ମୋହର

କଳଙ୍କିନୀର ଏ ଟୀକା

କାହା ପାଖେ ଅଛି ଉତ୍ତର ତ କୁହ

କିଏ ଦେଲା ମତେ ଧୋକା ।

କେତେ ସ୍ୱପ୍ନ ଥିଲା ଫୁଲ ହୋଇକରି

ଅଗଣାରେ ମୁଁହିଁ ଥିବି

କିଏ ଜାଣିଥିଲା କାଳଙ୍କିନୀ ହୋଇ

ରାସ୍ତା ଘାଟେ ବୁଲୁଥିବି ।

କହିବାକୁ ଆଜି ଖୁସି ଲାଗୁଅଛି

ସମସ୍ତଙ୍କୁ ସମାଜରେ

ଛାତିରେ ତ ହାତ ଦେଇକରି କୁହ

କରିଛ ଯାହା ଜୀବନରେ ।

ନାରୀ ମାଂସ ଲୋଭୀ ସେଇ ମାନଙ୍କୁ ମୁଁ

କଥା ଗୋଟେ ପଚାରୁଛୁ

କିଏ କଳଙ୍କିନୀ ବନେଇଲା ଆଜି

ଉତ୍ତର ଯେ ଚାହୁଁଅଛ ।