କଳାବାମନ
କଳାବାମନ
ଆଡପ ମଣ୍ଡପେ ନବମୀ ତିଥିରେ
ସନ୍ଧ୍ୟା ଧୂପ ମଇଲମ
ଦରଶନ ମାତ୍ରେ କଳାବାମନଙ୍କୁ
ମିଳେ ସାର୍ଥକତା ପୁଣ୍ୟ
ରହିଛି ବିଶ୍ୱାସ ବିଧି
ମହାପ୍ରଭୁଙ୍କର ଦୁର୍ଲଭ ଦର୍ଶନେ
କର୍ମ ଚଉବର୍ଗ ସିଦ୍ଧି ।
ଜନ୍ମବେଦୀ ସ୍ଥଳ ପରମ ପବିତ୍ର
ନିତ୍ୟ ରାହାସର ସ୍ଥଳୀ
ବିଜେ ହୋଇଥାନ୍ତି ଚତୁର୍ଦ୍ଧାମୂରତି
ପାଟ ପୀତାମ୍ବରୀ ପିନ୍ଧି
ବଡ଼ସିଂହାର ସୁବେଶ
ଦିଅଇ ଆନନ୍ଦ ଦିବ୍ୟ ଦରଶନ
ଶାନ୍ତି ପରମ ସନ୍ତୋଷ ।
ଗୁଣ୍ଡିଚା ମନ୍ଦିରେ ଲାଗଇ ଗହଳୀ
ଚଉପାଶ ଲୋକାରଣ୍ୟ
ବରଷନ୍ତି କୃପା ପତିତ ପାବନ
ଜୀବନ ହୁଅଇ ଧନ୍ୟ
ଜୟ ଜୟ ଜଗନ୍ନାଥ
ଘଣ୍ଟ ଘଣ୍ଟା ନାଦ ହୁଳହୁଳି ଶବ୍ଦ
ମୁଖରିତ ପୁଲକିତ ।
ପହୁଡ଼ ଆଳତୀ ଶେଷ ଦରଶନ
ଠୁଳଶୂନ୍ୟ ରୂପକାନ୍ତି
ହରେ ପାପତାପ ଅଭାବ କଷଣ
ଦିଏ ଅମୃତ ପ୍ରଶାନ୍ତି
ଶଙ୍ଖନାଭି ଶ୍ରୀକ୍ଷେତ୍ରରେ
ଉଡୁ ଧର୍ମଧ୍ୱଜା ଶ୍ରୀପୁରୁଷୋତ୍ତମେ
ଜୟ ଜଗଦୀଶ ହରେ ।