କିଏ ଗୋ ଅତିଥି

   

ଦୂରୁ ଶୁଭିଲାଣି କାହା ପାଦ ଶବ୍ଦ

ଅମାବାସ୍ୟା ଅନ୍ଧକାରେ,

ଦୂର ଦିଗନ୍ତରେ କିଏ ଆଗନ୍ତୁକ 

ଆସୁଅଛ ନିଃଶବ୍ଦରେ ।

ମାୟା ଆଳୟରେ ଚୁପି ଚୁପି ଆସି 

କରୁଅଛ ଅଭିନୟ,

ସବୁଜ ମାୟାରେ କିଏ ଗୋ ଅତିଥି

ଦିଅ ତୁମ ପରିଚୟ ।

ମୁଁ ପାଇଛି କିନ୍ତୁ ସେଇ ଅନୁଭବ

ଅଦେଖା ମନର ତଳେ ,

ବିଶ୍ୱାସ, ଭରସା ପୁଳେ ଦେଇଯାଅ

ଦୃଢ଼ ପ୍ରତିଶ୍ରୁତି ବଳେ।

ପରିଚୟ ତୁମ ଦିଅ କି ,ନଦିଅ

ତୁମକୁ ନଚିହ୍ନେ କିଏ ,

ତୁମେ ପରା ମୃତ୍ୟୁ ସମୟର ସାଥି

କାଳ ଡ଼ାକି ଆଣିଥାଏ ।

ଅଲୋଡ଼ା କି ଲୋଡ଼ା ତୁମେ ଜାଣନାହିଁ 

ନିର୍ବିକାରେ ଆସ ଚାଲି ,

କୁହ ହେ ମୃତ୍ୟୁ! ବିନା ନିମନ୍ତ୍ରଣେ

ଡ଼ାକିଛ କାହାକୁ ଭୁଲି ।?

ଅଧା ଜଳା ଏଇ ସଞ୍ଜବତୀ ପାଇଁ

ନିଶୀଥେ ସଜାଅ କୁଞ୍ଜ,

ମୋର ପରିଚୟ ସମର୍ପି ଦେବି ମୁଁ

ବେଳ ବୁଡ଼ି ହେଲେ ସଞ୍ଜ ।

ତୁମ ଅଭିସାର ନିଷ୍ଫଳ ହେବନି

ମୃତ୍ୟୁ ତୁମେ ଅଭିମାନୀ ,

ତୁମ ହାତ ଧରି ଚାଲିଯିବି ଥିରି 

ମୁଁ ବି ବଡ଼ ସ୍ଵାଭିମାନୀ ।

 

ଦେହାବସାନ ମୋ ,ହୋଇଗଲା ପରେ

ସରିବ ତୁମ ସତ୍କାର ,

ଜୁଇ ନିଆଁ ଦେଖି ଖୁସି ହେବ ତୁମେ 

ଶୁଣି ମୃତ୍ୟୁ ଜୟକାର।