ସମ୍ପର୍କର ବାସ୍ନା

ଆଜି ଦୁନିଆରେ ଶ୍ରଦ୍ଧା, ସ୍ନେହ ଭାବ 

କେଜାଣି କିପରି ବୁଣା ହେଉଛି ,

ଅବିଶ୍ବାସ ବୀଜ ଅଙ୍କୁରିତ ହୋଇ 

କଳୁଷ ବାସ୍ନାରେ ମହକୁ ଅଛି ।

ବାଧ୍ୟ ବାଧକତା ନୁହଁଇ ସମ୍ପର୍କ 

ଯଦି ଆବିଳତା ମନରେ ଥାଏ,

ଆପଣା ହେବାଠୁ ପର ହେବା ଭଲ 

ବନ୍ଧନରେ ଯଦି ମିଠା ନଥାଏ।

ମନର ଶାନ୍ତିଟି ମିଳେ ସେହିଠାରେ 

ଯେଉଁଠି ନିଜର ମନଟି ଚାହେଁ ,

ହୃଦୟ ସେଦିନ ଆପଣାର ଲାଗେ 

ଯଦି ସମ୍ପର୍କରେ ମଧୁର ଥାଏ ।

ମନ କି ବୁଝଇ ହୃଦୟର ଭାଷା 

ଡେଣା ଝାଡ଼ିବାକୁ ସଦା ତତ୍ପର ,

ଥରେ ଉଡ଼ିଗଲେ ଶୂନ୍ୟ ଆକାଶରେ 

ନିଜର ଲାଗନ୍ତି କେତେ ଯେ ଦୂର ।

ଜୋର୍ ଜବର୍ ରେ ମନକୁ ବାନ୍ଧିଲେ 

ବନ୍ଧନଟି ସଦା ଫିକା ଲାଗିବ ,

ମନ ଯେଉଁଠାରେ ପରତିବ ନାହିଁ 

ହୃଦୟ ବା କାହୁଁ ଆପଣା ହେବ।

ଶୂନ୍ୟ ବେଭାରରେ ଶୂନ ହିଁ ମିଳିବ

ଦେଖାଣିଆ ଭାବ ଅଭାବ ହେବ,

ଅଭାବି ମନରେ ଭାବକୁ ଖୋଜିଲେ 

ଆତ୍ମିୟତା ଭାବ କାହୁଁ ମିଳିବ।

ମନ ଓ ହୃଦୟ ଏକାଠି ହୋଇଲେ 

ସେ ହୁଏ ସବୁଠୁଁ ଅମୂଲ୍ୟ ଧନ ,

ମନ ମିଶିଗଲେ ହୃଦୟ ମିଶିଲେ 

ବଢ଼ିଯାଏ ଶତ ତାହାରି ମାନ ।

ଅତି ସୌଭାଗ୍ୟରେ ଏପରି ବନ୍ଧନ 

ମଧୁର ସମ୍ପର୍କ ତାହାରି ନାମ,

ଅସମ୍ଭବ ଆଜି ଏପରି ସମ୍ପର୍କ 

ପ୍ରଭୁ ବିନା କେହି ନୁହଁଇ ଜନ ।