କହରେ କାଳିଆ ମତେ ତୁ ବୁଝାଇ

କହରେ କାଳିଆ ମତେ ତୁ ବୁଝାଇ 

କାହିଁକି ତୋ' ଚକାଆଖି ?

କାହିଁକି ବସିଛୁ ବଡ଼ ଦେଉଳରେ

କଜଳର କଳା ମାଖି ।

କହରେ କାଳିଆ ମତେ ତୁ ବୁଝାଇ

ଆଖିରେ ତୋ' କାହିଁକି ପଡେନି ପଲକ?

କଂସାଏ ପଖାଳରେ ପେଟ ପୁରିଥାଏ

ଛପନ ଭୋଗରେ ନ ମରେ ତୋ' ଭୋକ ।

କହରେ କାଳିଆ ମତେ ତୁ ବୁଝାଇ

କାହିଁକି ଦେହ ରଙ୍ଗ କଳା ତୋର ?

ସାରା ସଂସାରକୁ ସୌନ୍ଦର୍ଯ୍ୟେ ଗଢ଼ିଲୁ

ନିଜକୁ ତୁ କରି ଅସୁନ୍ଦର ।

କହରେ କାଳିଆ ମତେ ତୁ ବୁଝାଇ

କାହିଁକିରେ ଅଧାଗଢା ତୋ' ସ୍ୱରୂପ?

ହସ୍ତ ପାଦ ଦେଇ ସଭିଙ୍କୁ ଗଢ଼ିଛୁ

ନିଜକୁ କରିଛୁ ପଙ୍ଗୁ ରୂପ।

ତୋର ଲୀଳା ଖେଳା ତୋର ଆଦିଅନ୍ତ

ତତେ ହିଁ ସବୁତ ଜଣା

ଲୀଳାମୟ ଠାକୁର ତୁ ,

ତୋ' ଉତ୍ତର ଖୋଜିଲେ

କ୍ଷୁଦ୍ର ମସ୍ତିଷ୍କ ମୋ ହୋଇଯିବ ବାଟବଣା।