କେମିତି କେମିତି ଲାଗୁଛି
କେମିତି କେମିତି ଲାଗୁଛି
ଅନେକ ମୃତ୍ୟୁ ଦେଖିବା ପରେ
ଜୀବନ ଅବାସ୍ତବ ଲାଗୁଛି,
ବଞ୍ଚିବାର ମୋହ କମି କମି ଯାଉଛି
ଆଉ ମୃତ୍ୟୁ ନିଜର ନିଜର ଲାଗୁଛି ।
କେହି ନୁହନ୍ତି ସେମାନେ ମୋର
ତଥାପି କାହିଁକି ବଡ ଅଥୟ ଲାଗୁଛି !
ଯନ୍ତ୍ରଣାରେ ମରୁଥିବା ପ୍ରତ୍ୟେକ ମଣିଷ
ସମ୍ପର୍କରେ ମୋର ବାପା ବାପା ଲାଗୁଛି ।
ମୁକ୍ତ ଅମ୍ଳଜାନର ବି ନିଲାମ ଚାଲିଛି
ନିଃଶ୍ୱାସ ନେବାକୁ ଏଠି ଡର ଡର ଲାଗୁଛି,
ଅବିଶ୍ୱାସର ଚଦର ଘୋଡ଼ିହେଲା ପରେ
ଦିନର ଆଲୁଅ ବି ଅନ୍ଧାର ଅନ୍ଧାର ଲାଗୁଛି ।
ମଶାଣି ତ ବହୁ ଦୂର ପାଖ କେହି ମାଡୁନି
ଛାଇ ଡେଇଁ ଗୋଡ଼ ହାତ ଧୋଇବାକୁ ଲାଗୁଛି,
ଶବଟିର ନିଜର ବୋଲି କେହି କେବେ ଥିଲେ
ଭାବିବାକୁ ସତରେ ବଡ ଅବିଶ୍ୱାସ ଲାଗୁଛି !
କିଏ ଭାଷଣରେ ମାତିଛି ତ କିଏ ତୋଷଣରେ ମାତିଛି !
କାହାକୁ ଏସବୁ ପୁଣି ଭାରି ମଜା ଲାଗୁଛି,
ମରଣକୁ ଭୟ ନାହିଁ କହୁଥିବା ଲୋକଙ୍କର
ଆଜିକାଲି ଟୀକା ପାଇଁ ପ୍ରତିଯୋଗିତା ବି ଲାଗୁଛି ।
ହସିବି ନା କାନ୍ଦିବି ଭାବିଲା ବେଳକୁ
ନିଜକୁ ନିଜେ ମୋତେ ପାଗଳ ପରି ଲାଗୁଛି,
ସତରେ ବଞ୍ଚିବାର ମୋହ କମି କମି ଯାଉଛି
ଆଉ ମୃତ୍ୟୁ ନିଜର ନିଜର ଲାଗୁଛି ।।