Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Santosh Kumar Nayak

Abstract Romance Others

4  

Santosh Kumar Nayak

Abstract Romance Others

କେଦାରଗୌରୀ ଉପାଖ୍ୟାନ

କେଦାରଗୌରୀ ଉପାଖ୍ୟାନ

1 min
462



ବହୁଦିନ ତଳେ ପ୍ରଦେଶ ଉତ୍କଳେ

ଥିଲା ଜଣେ ସୁକୁମାର,

ରୂପେ ରତିପତି ଗୁଣରେ ଯୁଧିଷ୍ଠି

ନାମ ତା ଥିଲା କେଦାର ।


ଅତି ସୁକୁମାରୀ ନାମଟି ଗଉରୀ

ଷୋଡ଼ଶୀ ସୁନ୍ଦରୀ ବାଳା,

ଆଖିରେ ପୀରତି ଦେହେ ପ୍ରଜାପତି 

ମନରେ ଖେଳେ ଚପଳା ।


ଘନ ସୌଦାମିନୀ ମୃଗାଙ୍କ ରଜନୀ

କମଳ ତପନ ସମ

କେଦାର ଗଉରୀ ଦୁହିଁଙ୍କର ଭାରି

ଗଭୀର ହୋଇଲା ପ୍ରେମ ।


ପୀରତି ଗୋପନ ରହେ କି ମଉନ!

ଜାଣିଲେ ପାଖ ପଡିଶା,

ଦାଣ୍ଡରେ ପଡ଼ିଲା ହାଟରେ ଗଡିଲା

ଦିହିଙ୍କର ମିଳାମିଶା ।


ଜାତି ଭିନ୍ନ ଭିନ୍ନ ଉଚ୍ଛନ୍ନ ଯୌବନ

ଦୁହେଁ ପ୍ରେମେ ଉବୁଡୁବୁ,

ସମାଜ ଶୃଙ୍ଖଳ ପ୍ରେମ ପାଇଁ କାଳ

କରି କି ପାରିବ କାବୁ ?


ଦୁହେଁ ହାତଧରି ଗାଆଁରୁ ବାହାରି

ଚାଲିଗଲେ ବହୁ ଦୂର,

ନାହିଁ ଜମା ଡର ଆଉ ବା କାହାର

ସାହା ଯେ ପରମେଶ୍ୱର ।


ମନ ସିନା ଖୋଲା ପେଟ ତ ଭୋକିଲା

କି ଖାଇ ରଖିବେ ପ୍ରାଣ?

କହିଲା କେଦାର ଟିକେ ଧୈର୍ଯ୍ୟ ଧର

କରୁଛି ମୁଁ ଅନ୍ୱେଷଣ ।


ଖାଦ୍ୟ ଖୋଜି ବନେ କେଦାର ସେଦିନେ

ଏଣେତେଣେ ଘୁରିବୁଲେ,

ଗଉରୀ ବିଚାରୀ ବାଟ ଚାହିଁ ତାରି

ବସିଛି ପାଦପ ତଳେ ।


ତନ ଶଙ୍କିଗଲା ସହସା ଶୁଭିଲା 

ମହାବଳ ଗରଜନ,

ଧାଇଁଲା ଅବଳା‌ କି ଅବା ହୋଇଲା

କାହିଁ ଥରୁଅଛି ମନ ?


ଦେଖିଲା ନୟନ ଦେହ ପ୍ରାଣହୀନ

ଠାବେ ଠାବେ ରକ୍ତ ଚିହ୍ନ,

ବାଘର ଆହାର ହୋଇଛି କେଦାର

ଗଉରୀ କରେ ରୋଦନ ।


ଯେତେ ଯାହା କଲେ ଲୁହ ଝରାଇଲେ

ଫେରିବ କି ଗଲା ଜନ?

କାହାକୁ ଅନାଇ ବଞ୍ଚିବି ଯେ ମୁହିଁ

ବୁଝୁନି ଅବୁଝା ମନ ।


ପାଖ ପୁଷ୍କରିଣୀ ଭରପୁର ପାଣି

ଦେଖିଲା ନିଆସି ଆଖି,

ଡେଇଁଲା ପ୍ରେୟସୀ ଆତ୍ମା ହେଲା ଖୁସି

ପ୍ରେମ ରହିଗଲା ସାକ୍ଷୀ ।


ଅତିନ୍ଦ୍ରୀୟ ଦେଶେ ବର ବଧୂ ବେଶେ

ଦୁଇ ଆତ୍ମା କଲେ ଘର,

ଆଉ ସେଇ ପୁରେ ପ୍ରେମ ବିରୋଧରେ

ତୋଳିବେନି କେହି ସ୍ଵର ।


ଉତ୍କଳର ଇନ୍ଦୁ ରାଜା ଲଲାଟେନ୍ଦୁ

କେଶରୀ ମଉଡମଣି

ଗଢିଲେ ମନ୍ଦିର ଅତୀବ ସୁନ୍ଦର

ପୁରାଣ କାହାଣୀ ଶୁଣି ।


କେଦାର ଗଉରୀ ଭରଷା ସବୁରି

ଠିକଣା ଭୁବନେଶ୍ୱର, 

ପ୍ରେମୀ ମାଗେ ଭିକ୍ଷା ପ୍ରେମକୁ ସୁରକ୍ଷା 

ଦିଅ ହେ କେଦାରେଶ୍ୱର ।


Rate this content
Log in