Library
Profile
କାଉଡିଆ କାନ୍ଧେ ବାହୁଙ୍ଗୀ ଭାର
କାଉଡିଆ କାନ୍ଧେ ବାହୁଙ୍ଗୀ ଭାର
କାଉଡିଆ କାନ୍ଧେ ବାହୁଙ୍ଗୀ ଭାର
ଶିବ ପଞ୍ଚାକ୍ଷର ଅମୃତ ଝର
ଶ୍ରାବଣର ସୋମବାର
ମହାଦେବ ହେବେ ଜଳେ ଅଭିଷେକ
ଆଜି ତାଙ୍କ ପୁଣ୍ଯ ବାର ।
ଓଁକାର ବିନ୍ଦୁରେ ସଂଯୁକ୍ତ ହୋଇ
ନମଃ ଶିବାୟ ଶୁଭୁ ଅଛି ରହି
ଯୋଗୀଗଣ ନିତ୍ଯ ଧ୍ୟାୟି
କାମଦ ମୋକ୍ଷଦ ଗତିକି ଲଭନ୍ତି
ଓଁକାର ନିତ୍ଯ ଅଟଇ ।
ଅଜାତ ଅଜନ୍ମା ଅପରାଭବ
ନାନାଶକ୍ତିଧର ଶ୍ରୀସଦାଶିବ
ମହାଦେବ ମହାତ୍ମାନ
ମହାଯୋଗୀ ମହେଶ୍ବର ମହାପାପ
ହରନ୍ତି ହର ଈଶାନ ।
ଶିବ ଶାନ୍ତ ଜଗନ୍ନାଥ ବୋଲାନ୍ତି
ଲୋକକୀର୍ତ୍ତି ବର୍ଦ୍ଧକ ସେ ଅଟନ୍ତି
ଶିବ ଏକା ପରଂବ୍ରହ୍ମ
ବୃଷଭବାହନ ବାସୁକୀ ତାଙ୍କର
ଶୋଭିତ କଣ୍ଠଭୂଷଣ ।
ବାମାଙ୍ଗେ ଶକତି କରି ଧାରଣ
ଯହିଁ ଯହିଁ ଶିବ ଅଛନ୍ତି ଜାଣ
ଯୋଗରେ ଜ୍ଞାତ ହୁଅନ୍ତି
ସକଳ ଭୂତଙ୍କ ଗୁରୁ ସଦାଶିବ
ସର୍ବ ଭୁତେ ତାଙ୍କ ସ୍ଥିତି ।
କାଉଡିଆ କାନ୍ଧେ ବାହୁଙ୍ଗୀ ଧରେ
ଶିବ ପଞ୍ଚାକ୍ଷର ଅମୃତ ଝରେ
ମୁଖରିତ ପାଥ ପଥ
ଆଶୁତୋଷ ଶିବ ପଞ୍ଚାକ୍ଷର ମନ୍ତ୍ରେ
ହେବେ ପରା ଅଭିଷିକ୍ତ ।
ଜଳେ ଆଶୁତୋଷ ହୁଅନ୍ତି ତୋଷ
ଅମୃତ ତୁଲ୍ୟ ହେଲା କଣ୍ଠେ ବିଷ
ଜଳ ଢାଳି କାଉଡିଆ
ମନସ୍କାମନା ତା କରିବ ପୂରଣ
ମହେଶ ତାହାର ସାହା ।
