ରାକ୍ଷୀ ପୂର୍ଣ୍ଣମୀର ଶୁଭକାମନା

 ତୁମ ହାତେ ମୁହିଁ     ବାନ୍ଧି ଦେଉଅଛି

      ସ୍ନେହ ପ୍ରୀତି ଭରା ରାକ୍ଷୀ

 ନୁହଇ ଫେସନ     ଲୋକ ଦେଖାଣିଆ

    ଏ ଆମ ସ୍ନେହ ମମତାର ସାକ୍ଷୀ ।

ଯେତେ ଦିନ ମୁହିଁ     ଥିବି ଏ ଜଗତେ

     ତୁମ ଶୁଭାଶିଷ ରହୁ

 ଛାଇଟିଏ ହୋଇ     ତୁମ ଦୁଇ ହାତ

     ମୋର ମଥାପରେ ଥାଉ ।

ହୋଇଥାଉ ପଛେ     ସୂତାଟିଏ ଏହା

         ଅଟଇ ଅମୂଲ ମୂଲ

ମୋ ସେନେହ ବୋଳା   ଭକ୍ତି ପ୍ରୀତି ହୀରା

     ମୋତି ମୁକ୍ତା ସମତୂଲ ।

ବାନ୍ଧିଲି ଏ ରାକ୍ଷୀ      ରଖିବ ମୋ ମାନ

       ଜୀଇଁଥିବି ଯେତେ କାଳ

ବିଳାସେ ବ୍ୟସନେ     ଅଥବା ସ୍ମଶାନେ

        ସାହା ହେବ ଚିରକାଳ ।

ଜୀବନ ପଥରେ     ଝୁଣ୍ଟି ପଡେ ଯଦି

       ଆଖିରୁ ଝରାଏ ଲୁହ

ଏଇ ହାତେ ଧରି     ପୋଛି ଦେବ ତୁମେ

     ନେତ୍ରୁ ପ୍ରବାହିତ ଲୁହ ।

 ତୁମେ ମୋର ଭାଇ   ଥାଉ ତୁମ ଛାଇ

        ମୋର ମସ୍ତକ ଉପରେ 

  ସୁରକ୍ଷା କବଚ      ହୋଇ ରହିଥିବ

      ସବୁ ଦୁଃଖ ଆପଦରେ ।

 ଏତିକି ଗୁହାରି     ପ୍ରଭୁଙ୍କ ପାଦରେ

      ଆଜିର ଶୁଭ ଲଗନେ

 ମୋ ଭାଇ ଜୀବନ   ସୁଖମୟ ହେଉ

     ଦୁଃଖ ନ ଆସୁ ତା ଜୀବନେ ।

ତା ଓଠରୁ ଝରୁ      ହସର ମୁକୁତା

      ବରଷୁ ସୁଖ ଶ୍ରାବଣ

 ଚଲାପଥ ତାଙ୍କ     ହେଉ କୁସୁମିତ

   ହଟିଯାଉ ଦୁଃଖ କଷଣ ।