Library
Profile
ଶକ୍ତି ସଂରକ୍ଷଣ
ଶକ୍ତି ସଂରକ୍ଷଣ
ମାଆ ମାଆ ବୋଲି କେତେ ମୁଁ ଖୋଜିଲି
ମାଆକୁ ପାଇଲି ନାହିଁ
ସପନରେ ଆସି ଦଶଭୁଜା ରୂପେ
ମାଆ ଗଲେ କହିଦେଇ ||
ସେ ତସେହି ଦେବୀ ସର୍ବ ଭୁତେ ଯିଏ
ଶକତି ରୂପେ ସଂସ୍ଥିତା
ସେତ ସେହି ଦେବୀ ସମଗ୍ର ସୃଷ୍ଟିରେ
ଜନନୀ ରୂପେ ପୂଜିତା ||
କ୍ଷିତି ଅପଃ ତେଜ ମରୁତ ଓ ବ୍ୟୋମ
ପଞ୍ଚ ମହାଭୁତ ନେଇ
ପ୍ରଭୁ ସୃଷ୍ଟିକର୍ତ୍ତା ସୃଷ୍ଟିର ରଚନା
କରିଛନ୍ତି ଜାଣ ଭାଇ ||
ବିଶ୍ବ ବ୍ରହ୍ମାଣ୍ଡର ସର୍ବ ସଂରଚନା
ତିଷ୍ଠିଛି ଶକତି ବଳେ
ସକଳ ଘଟରେ ପରାଣ ସଂଚାର
ଘଟଇ ଶକତି ବଳେ||
ବିଜ୍ଞାନ ଭାଷାରେ ଶକତି ଅଟଇ
କାର୍ଯ୍ୟ କରିବା ସାମର୍ଥ୍ୟ
ଯାହାର ପାଖରେ ଯେତେ ବେଶି ଶକ୍ତି
ସେତେ ବେଶି ତା' ସାମର୍ଥ୍ୟ
ବିଶ୍ବ ବ୍ରହ୍ମାଣ୍ଡରେ ବିଭିନ୍ନ ରୂପରେ
ଶକ୍ତି ଅଟେ ବିଦ୍ୟମାନ
ସରନ୍ତି ହେଉକି ଅସରନ୍ତି ହେଉ
କରେ ଶକ୍ତି ଅଧିଷ୍ଠାନ |
ଧ୍ବନି ଶକ୍ତିବଳେ କଥା ଶୁଣୁ ଆମେ
ଆଲୋକର ବଳେ ଦେଖୁ
ରସାୟନ ଶକ୍ତି ଖାଦ୍ୟରୁ ପାଇଣ
ନାଚୁ ଖେଳୁ ଗାଉ ଲେଖୁ ||
ବିଦ୍ୟୁତ ଶକତି ବଳରେ ଆମର
କଳ କାରଖାନା ଚଳେ
ରାତିର ଅନ୍ଧାର ଦୂର କରିପାରୁ
ଶିତ ତାପ ପାଉ ଭଲେ ||
କୋଇଲା ଜାଳେଣୀ ପେଟ୍ରୋଲିୟମ୍ ଠାରେ
ଅଛି ରସାୟନ ଶକ୍ତି
ସହସ୍ର ସହସ୍ର ବରଷେ ପ୍ରକୃତି
ସୃଷ୍ଟି କରିଛି ସେ ଶକ୍ତି ||
ତାହା ବଳେ ଚଳେ କଳ କାରଖାନା
ଚଳଇ ମୋଟର ଯାନ
ତାପଜ ବିଦ୍ୟୁତ ଶକତିର ଉତ୍ସ
କୋଲ୍ ପେଟ୍ରୋଲିୟମ୍ ଜାଣ ||
ସହସ୍ର ବର୍ଷର ସାଧନା ବଳରେ
ପ୍ରକୃତି କରିଛି ସୃଷ୍ଟି
ଦାୟିତ୍ବ ହୀନରେ ବ୍ୟବହାର କରୁ
ନାହିଁ ଆମ ଦୂରଦୃଷ୍ଟି ||
ଏହାର ବିପୁଳ ବ୍ୟବହାର ଯଦି
ଆଜିପରି କରି ଚାଲୁ
ଏ ସରନ୍ତି ଶକ୍ତି ନିଃଶେଷ ହୋଇବ
ହେବା ଆମେ ବଣ ଭାଲୁ ||
ଜୁଆର ଜଳରୁ ସୂରୁଯ ଆଲୋକୁ
ଜୈବ ଅପଦ୍ରବଠାରୁ
ଜୈବ ପଦାର୍ଥରୁ ସୁଲଭ ଶକତି
ଖୋଜ ସର୍ବେ ଆଜିଠାରୁ||
ଯେଉଁ ଶକ୍ତି ଅଟେ ଅସରନ୍ତି ଶକ୍ତି
କର ତାର ବ୍ୟବହାର
ସରନ୍ତି ଶକ୍ତିର କରି ସଂରକ୍ଷଣ
ବଢାଅ ଶକ୍ତି ସଂମ୍ଭାର ||
(E=mc^2)ଇ ଇଜ୍ ଇକୁଆଲ ଟୁ ଏମ୍ ସିସ୍ଲୋୟାର୍ଡ
ସୂତ୍ରର ପ୍ରୟୋଗ ବଳେ
କ୍ଷୁଦ୍ର ପରମାଣୁ ସମେକନ(fusion) ବଳେ
ତେଜଷ୍କ୍ରିୟ ଶକ୍ତି ମିଳେ ||
ବସ୍ତୁତ୍ବ ତୃଟି ବା ବସ୍ତୁତ୍ବ ପାର୍ଥକ୍ୟ
ବିନାଶ ଯେବେ ହୁଅଇ
ବସ୍ତୁର ବିନାଶେ ଶକତି ଉତ୍ପନ୍ନ
ହୋଇ ପାରଇ ହେ ଭାଇ ||
ଇଉରାନିୟମ୍ ଅବା ଥୋରିଅମ୍ ହେଉ
ଅଟେ ଭାରି ତେଜସ୍କ୍ରିୟ
ବୋମା ମଧ୍ୟେ ନୁହେଁ ରିଆକ୍ଟର ମଧ୍ୟେ
କରିବାରେ ବିନିମୟ ||
ତାହା ପରିମାଣ ଧରଣୀ ଗରଭେ
ଅଟଇ ସିମିତ ଜାଣ
କମ୍ ବ୍ୟବହାର କରିଣ ତାହାର
କରିବା ତା ସଂରକ୍ଷଣ ||
ବିସ୍ତିର୍ଣ୍ଣ ସାଗର ବେଳାଭୂମି ତଟେ
ବସାଇ ପବନ ଚକ୍ରୀ
ବିଦୁତ୍ଉତ୍ପାଦନ ବଢାଇବା ଆମେ
କୋଇଲାଦି ସଞ୍ଚି କରି ||
ପ୍ରକୃତିର ଚିର କାଳ ପ୍ରବାହିତ
ପବନର ବ୍ୟବହାରେ
ଶକତି ଅଭାବ ହୋଇବ ପୂରଣ
ଜାଣ ଭାଇ ସବୁଠାରେ ||
ସୁରୁଯ ଢାଳଇ ଉଜ୍ଜ୍ବଳ ଆଲୁଅ
ବର୍ଷସାରା ସବୁଠାରେ
ଫଟୋ ଭୋଲଟୀୟ ପ୍ରଭାବ ଘଟାଇ
ବିଦୁତ ଉତ୍ପନ୍ନ କରେ;
ସେହି ବିଦୁତର ବ୍ୟବହାର ଆମେ
କରିବାରେ ଘରେ ଘରେ
ସୌର ଫଳକର ସ୍ଥାପନ କରିଣ
ଆମ ଘର ଛାତପରେ||
ପ୍ରକୃତି ଆମକୁ ଖଞ୍ଜି ଦେଇଅଛି
ଅସୀମ ଶକ୍ତି ଭଣ୍ଡାର
ସରନ୍ତି ଶକତି ରଖିବା ସାଇତି
ବ୍ୟବହାରେ ବିକଳ୍ପର ||
ଆସ ଭାଇ ବନ୍ଧୁ କୁଟୁମ୍ବ ସକଳେ
ଭବସିନ୍ଧୁ ସ୍ଥଳପରେ
ଆକାଶ ବତାସ ଶୂନ୍ୟେ ମହାଶୂନ୍ୟେ
ଲାଗ ଶକ୍ତି ସଂନ୍ଧାନରେ
ସାଇତି ରଖିବା ପ୍ରକୃତିକୁ ଆମ
କରିବା ତା ସଂରକ୍ଷଣ
ବିନାଶ ନକରି ବିକାଶ କରିବା
ହୋଇ ସର୍ବେ ସଚେତନ ||
