କାଶତଣ୍ଡି

   

      

           

  ନିଦାଘ ଚୁମ୍ବଇ ବରଷା

                           ହସେ ପ୍ରକୃତି ରାଣୀ

  ସନ୍ତାପ ଧରଣୀ ଶୀତଳ

                             ସବୁଜିମା ବନାନୀ ।

  ଚାତକେ ଲଭିଲେ ସନ୍ତୋଷ

                              ପାଇ ଅମୃତଧାରା

  ସରିତେ ଉଚ୍ଛୁଳି ନାଚିଲେ

                         କୋଳରେ ବାରିଧାରା ।

  ଶୁଭ୍ର କାଶତଣ୍ଡି ମହୀରେ

                           ଆସି ହେଲାଣି ଉଭା

  ଚମତ୍କାର ଧରା ଦିଶଇ

                              ଯାର ମଣ୍ଡିତ ଗଭା ।

  ପ୍ରକୃତି ଛଟକ ନାଟକ

                           ଦେଖି ଭଟକେ ମନ

  ହଟ ଛାଡ଼ିଦେଇ ବାଳକେ

                         ହାଟେ ନାଟେ ମଗନ ।

  କେକିଏ ନାଚିଲେ ବନସ୍ତେ

                             ପୁଚ୍ଛ ଉର୍ଦ୍ଧ୍ଵକୁ ଟେକି

  ଘଞ୍ଚ ବନାନୀର ଗହଳେ

                            ପତ୍ରେ ନାଚନ୍ତି ଡାକି।

  ପୁରିଉଠେ ଧରା ନିର୍ମଳ

                             ଦେଖି ନୀଳ ଅମ୍ବର

  ଶୁଭ୍ର କାଶତଣ୍ଡି ତଟିନୀ

                            ହସେ ଶାଢୀ ଧବଳ ।

  ବିଲ ବନ ପ୍ରାନ୍ତ ସରିତ

                              ରାଜ ପଥ ପାରୁଶ

  ସ୍ତବନ୍ତି ବିଭୋରେ ସକଳେ

                             କାଶତଣ୍ଡି ସଙ୍ଗୀତ।

  ଜଗତ ଜନନୀ ଅମ୍ବିକା

                             ଧରା ଆଗତ ପାଇଁ

  କାଶତଣ୍ଡି ଢାଳେ ପ୍ରଣତି

                              ଶୁଭ୍ର ଚାମର ବାହି ।

  ଶରଦେ ବାଳିକେ ଶାରଦା

                               ପୂଜୀ ଖୁଦୁରୁକୁଣୀ

  ଜହ୍ନିଓଷା ଗୀତ ସଂଜରେ

                                ନିଏ ହୃଦୟ କିଣି।

  ଶାରଦୀୟ ନବରାତ୍ର ରେ

                              ଘରେ ଘରେ ଉତ୍ସଵ

  ପିଠାପଣା ନାନା ବ୍ୟଞ୍ଜନେ

                               ଚଉଦିଗ ସୌରଭ ।

  ସୌରାଷ୍ଟ୍ର ରମଣୀ ଗରବା

                             ଛନ୍ଦେ ନୃତ୍ୟେ ଉଛନ୍ନ

  ମନର ମଣିଷ ଆଶାରେ

                             ହୋଇ ଦେବୀ ପ୍ରସନ୍ନ ।

   ହେନା ଚମ୍ପା ମୋତି ତମାଳ

                                 ଫୁଲ ବାସଇ ମଲ୍ଲି

  ଶୋଭାମୟୀ ଶୋଭା ପସରା

                              ଧରା ଦେଇଛି ମେଲି ।

  ନାନାଭଙ୍ଗୀ ଫୁଲଫଳରେ

                                  ଭରପୁର ପାଦପେ

  ପାହାଡ ପର୍ବତ ଆକାଶେ

                                 ଅନୁପମ ପ୍ରକାଶେ ।

  କୋଟି ଲାବଣ୍ୟରେ ବିଭବ

                                ସଜ ଧରଣୀ ରାଣୀ     

 ଭାବୁକ ଦର୍ଶକ ଦର୍ଶନେ

                              ଆତ୍ମହରା ମୋହିନୀ ।

   ହସେ ବସୁମତି ବିଭବେ

                               ରାଜେ ଦିଗନ୍ତ ଯାଏ

  ନିଶାରେ ରସିକ ବିଭୋର

                                 ମନ ହଜାଇ ଦିଏ।

  ସୋନ୍ଦର୍ଯ୍ୟମୟୀ କାଶତାଣ୍ଡି

                               ତୋର ବାସନା ଥାଉ

  ଯୁଗଯୁଗ ଯାଏ ଅବନୀ

                              ତୋର ସଙ୍ଗୀତ ଗାଉ ।।