🥦🌹 *କାଳିଆ ସୁନା*🌹🥦

କାଳିଆ ସୁନା ମୋ କଳା ଠାକୁର

ମୋ ପାଖରୁ କେବେ ହେବୁନି ଦୂର

ତୋ ପାଇଁ ଆଜି ଦେଖିଛି ସପନ

ହସୁ ଅଛି ଆଜି ଏଇ ମୋ ଜୀବନ

 କରିବୁନି କେବେ ମୋତେ ତୁ ପର 

କାଳିଆ ସୁନା ମୋ କଳା ଠାକୁର ।

ଏତେ ବଡ ଏଇ ଦୁନିଆରେ ମୋର

    ତୋର ବିନା ନାହିଁ କେହି

ତୁ ଯଦି ମୋର ହାତ ଛାଡି ଦେବୁ

    କାହାର ହେବିରେ ମୁହିଁ ।

ତୋ ପାଇଁ ଚାଲୁଛି ଦୁନିଆରେ ବାଟ

ରଖିଛୁ ତୁ ସବୁ ମୋ ଅଳି ଅଝଟ

   ପୋଛି ଦେଇ ଆଖି ଲୁହର ଧାର

କାଳିଆ ସୁନା ମୋ କଳା ଠାକୁର ।

ଚଲାପଥ ମୋର କଣ୍ଟା ବଦଳରେ 

    ବିଛେଇ ଦେଇଛୁ ଫୁଲ

ସେ ଫୁଲ ଭିତରେ ଜାଣି ପାରିଲିନି 

   ଥିଲା ବୋଲି ନିଆଁ ଝୁଲ ।

ସେ ନିଆଁରେ ପାଦ ଫୋଟକା ହେଇଛି

ତଥାପି ତୋ ପରେ ଭରସା ମୋ ଅଛି

  ଛାଇ ହେଇ ପାଖେ ଥିବୁ ତୁ ମୋର

କାଳିଆ ସୁନା ମୋ କଳା ଠାକୁର ।

ତୋ ପାଇଁ ବଞ୍ଚିଛି ତୋ ପାଇଁ ହସୁଛି

    ତୋ ପାଇଁ ବିତେ ମୋ ଦିନ

ମୋ ଭାଗ୍ୟ ଆକାଶେ ଅମା ଅନ୍ଧକାରେ

    ସାଜିଛୁ ପୂନେଇଁ ଜହ୍ନ ।

ତୁ ଅଛୁ ବୋଲି ମୁଁ ରେ ରହିଛି

ତୋତେ ଆଶ୍ରା କରି ମୁଁ ରେ ବଞ୍ଚଛି

  ସାଥୀ ତୁ ମୋର ଯୁଗ ଯୁଗର ।

କାଳିଆ ସୁନା ମୋ କଳା ଠାକୁର ।

ତୁ ସାଥେ ଥିଲେ କିଛି ନାହିଁ ଡର

   ତୁ ମୋ ଜୀବ ଜୀବନ

ଚାଲୁଛି ଚାଲିବି ଏଇ ଦୁନିଆରେ 

   ଆସୁରେ ଝଡ ତୋଫାନ ।

ତୁ ମୋ ଭରସା ତୁ ମୋର ସାହା

ହାତ ଧରି ମୋର କଢେଉଛୁ ରାହା

  ଆଶ୍ରୟ ନେଇଛି ତୋର ପୟର ।

କାଳିଆ ସୁନା ମୋ କଳା ଠାକୁର ।

ଯାହା ତୁ କରିବୁ ସବୁ ତୋର ଇଚ୍ଛା 

    ମୋର ବୋଲି କିଛି ନାହିଁ 

ତୋର ଈଶାରାରେ ଚାଲୁଛି ଚାଲିବି

   ମଥା ପାତି ଦେଇ ମୁହିଁ ।

ଯୁଆଡେ ଚାହିଁବୁ ସିଆଡେ ତୁ ନେବୁ

ହେଲେ ସାଥେ ମୋର ତୁ ରହିଥିବୁ

ଏତିକି ମାଗୁଣୀ ତୋ ପାଦେ ମୋର ।

କାଳିଆ ସୁନା ମୋ କଳା ଠାକୁର ।