କାଳିଆ ହସୁଛି ରଥ ଉପରେ
କାଳିଆ ହସୁଛି ରଥ ଉପରେ
ବଡ଼ଦାଣ୍ଡ ଆଜି ମହ ମହ ବାସେ
ଭକତଙ୍କ ଭିଡ଼ ଲାଗିଛି
କର୍ପୂର ଚନ୍ଦନ ବାସ ମହକୁଛି
ଶରଧା ବାଲି ହସୁଛି ।
ଶରଧା ବାଲିରେ ଭକତଙ୍କ ସୁଅ
ସତେ ଅବା ଜନସିନ୍ଧୁ
ଜନ ସମୁଦ୍ରରେ କି ଶୋଭା ତ୍ରିରଥ
ଆଖି ଫେଡ଼ି ଦେଖ ବନ୍ଧୁ ।
ସୁସ୍ଥ ହେବା ପରେ ଚତୁର୍ଦ୍ଧା ମୁରତି
ଭ୍ରମଣ ଜନ୍ମ ବେଦୀକୁ
ମାଉସୀଙ୍କ ଠାରୁ ପୋଡପିଠା ଖାଇ
ତୋଷିବେ ଭକ୍ତ ଜନଙ୍କୁ ।
ବଡ଼ଦାଣ୍ଡ ଆଜି ଘୁ ଘୁ କମ୍ପୁଛି
ଘଣ୍ଟ ଘଣ୍ଟା ମାର୍ଦଳରେ
ନୃତ୍ୟକାରୀ ଦଳ ନୃତ୍ୟରେ ମଗନ
କାଳିଆ ହସେ ରଥରେ ।
ଭଜନ କୀର୍ତ୍ତନ ନାମାମୃତେ କମ୍ପେ
ବଡଦାଣ୍ଡ ଚତୁର୍ଦ୍ଦିଗ
ଶରଧା ବାଲି ଯେ ଭକତଙ୍କୁ ନେଇ
ହେଉଛି ଆଜି ଗର୍ବିତ ।
ଭକତ ମେଳରେ ପ୍ରେମ ମାଖୀ ଜଗା
ମୁରୁକି ମୁରୁକି ହସୁଛି
କର୍ପୂର ଚନ୍ଦନ ବାସ କୁ ପବନ
ଭକତେ ବାଣ୍ଟି ଦେଉଛି ।
ନନ୍ଦିଘୋଷେ ଦେଖ ଅପୂର୍ବ ଠାଣିରେ
କାଳିଆ ଚାହିଁ ହସୁଛି
କି ଅପୂର୍ବ ଭାବ ଭକ୍ତ ଭଗବାନ
ମିଳନ ଦେଖା ଯାଉଛି ।
ତାଳଧ୍ଵଜେ ବିଜେ ଭ୍ରାତା ବଳଦେବ
ଭଉଣୀ ଦେବ ଦଳନେ
ହଳଦୀ ମୁଖୀ ତ ସୁଭଦ୍ରା ଭଉଣୀ
ସଙ୍ଗେ ଥାନ୍ତି ସୁଦର୍ଶନେ ।
ଜନ ସମୁଦ୍ରରେ ବଡ଼ ନାଉରୀ ଯେ
ପାରି କରିବାକୁ ଠିଆ
ତା ଦେହର ବାସେ ମହ ମହ ବାସେ
ସର୍ବେ ହେଲେଣି ବାଇଆ ।
ରଥ ପଥ ଆଜି ଗର୍ବିତ ହେଉଛି
ଶରଧା ବାଲି ହସୁଛି
ଭକତ ବାନ୍ଧବ ହସୁଛି ରଥରେ
ଭକତ ଭାବେ ବୁଡ଼ିଛି ।
କର୍ପୂର ଚନ୍ଦନ ବାସ ଛୁଟାଇଛ
ମନ ସୁବାସିତ କର
ବାସ ଭରିଦିଅ ଭକତଙ୍କ ମନେ
ଜଗତ ଉଦ୍ଧାର କର ।