ଜୟ ଜଗନ୍ନାଥ

ପଥର ଦେଉଳେ  ଦାରୁଭୂତ ପ୍ରଭୁ

    ବସିଅଛ ଜଗନ୍ନାଥ

ବସିଛ ମଉନେ   ତୁମେ ଭଗବାନ

    ଦେଖୁଛ କଷଣ ଦୁଃଖ 

     ଭକତ ମରୁଛି ଝୁରି

ସତ କୁହ ପ୍ରଭୁ   ଭଜି ତୁମ ନାମ

    କିପରି ହୋଇବେ ପାରି ।

ସୁପବିତ୍ର ତୁମ    ବଡ଼ଦାଣ୍ଡ ଧୂଳି

     ଶ୍ରୀକ୍ଷେତ୍ର ପୁରୁଷୋତ୍ତମ

ଉଡାଉଛ ବାନା   ପତିତପାବନ

     କୈବଲ୍ୟ ମୁକତି ଧାମ

     ବସି ରତ୍ନ ସିଂହାସନେ

ବରଷକୁ ଥରେ   ରଥେ ବସି ଯାତ୍ରା

    କର ଉଲ୍ଲସିତ ମନେ ।

ସତ୍ୟ ଚିଦାନନ୍ଦ    ପରମ ଈଶ୍ୱର

     ଜଗଦୀଶ ଜଗନ୍ନାଥ

ଆଲୋକେ ଉଜ୍ଜ୍ୱଳ   ହୁଏ ଏ ଜଗତ

    ହୃଦେ ସଦା ପ୍ରତିଭାତ

      ଦିଅ ସଦବୁଦ୍ଧି ଜ୍ଞାନ

ସୁଲଭୁ ମଣିଷ   ଦିବ୍ୟ ଶୁଭାଶିଷ

     ସାର୍ଥକ ହେଉ ଜୀବନ ।

ସେବା ପରମାର୍ଥ   ହେଉ ଚରିତାର୍ଥ

    ଲକ୍ଷ୍ୟ ମଙ୍ଗଳ କଲ୍ୟାଣ

ବରଷୁ ଅମୃତ    ଭରୁ ସବୁଜିମା

     ଉଦୟ ହୁଅ ଅରୁଣ

    ଦୂର ହେଉ ଅନ୍ଧକାର

କୋଟି ସୂର୍ଯ୍ୟ ପ୍ରଭ   ସମୁଜ୍ଜଳ ଚନ୍ଦ୍ର

    ନିର୍ନିମେଷ ଦୁଇ ନେତ୍ର ।

          ----