ଜ୍ଞାନାର୍ଜ୍ଜନ କରୁଅଛୁ

               

ବିଦ୍ୟା ଅଧ୍ୟୟନ କରୁଅଛୁ ଏବେ

ଯେତେକ ବିଦ୍ୟାର୍ଥୀଗଣ,

ଲକ୍ଷ୍ୟ ପଥେ ଆମ ଆଗେଇ ଚାଲୁଛୁ

ଦେଇ ସର୍ବେ ମନ ପ୍ରାଣ ।

ସମୟାନୁବର୍ତ୍ତୀ ହୋଇ ଚଳୁଅଛୁ

କରି ଗୁରୁଜନେ ଭକ୍ତି,

ବନ୍ଧୁ, ଲଘୁଜନେ ସ୍ନେହ ଶ୍ରଦ୍ଧାରଖି

ପରିଶ୍ରମ କରୁ ନିତି ।

ଗୁରୁଙ୍କ କଥାକୁ ଧିଆନ ରଖୁଛୁ

ଅଭ୍ୟାସ କରୁଛୁ ପାଠ,

ବଡ଼ ହୋଇ କାଲି ଦେଶକୁ ଗଢିବୁ

ରହିଛି ନାନାଦି ବାଟ ।

ଡାକ୍ତର, କୃଷକ,ଯନ୍ତ୍ରୀ, ବୈଜ୍ଞାନିକ,

ସୈନିକ ହୋଇବୁ ପଢ଼ି, 

ନୂଆ ପରକାରେ ଭାରତବର୍ଷକୁ

ଦେବୁ ସୁନିଶ୍ଚିତ ଗଢ଼ି ।

ବିଭୁଙ୍କ ଉପରେ ଭରସା ରଖିକି

ଜ୍ଞାନାର୍ଜ୍ଜନ କରୁଅଛୁ,

ସଫଳତା ନିଶ୍ଚେ ପାଇବୁଟି ଦିନେ

ଏଇ ଆଶା ଧରିଅଛୁ ।

ଅଭାବ କଷଣ ଦୂର ହେବ ଦିନେ

ଉଇଁବ ନୂତନ ସୂର୍ଯ୍ୟ,

ଦେଶବାସୀ ଯେତେ ପ୍ରସନ୍ନ ହୋଇବେ

ଦେଖି ସେ ଉତ୍ତମ କାର୍ଯ୍ୟ ।