ଜଣେ ଆତ୍ମୀୟଙ୍କୁ ପଦେ

ମୁଁ କ'ଣ ବା ମାଗିଥିଲି ତୁମକୁ !

ମାଗିଥିଲି ଦିନକୁ ମୁଠେ ଭାତ

ରାତି ପାଇଁ ଗୋଟେ ସ୍ବପ୍ନ

ବେଶୀ କ'ଣ ମାଗିଦେଲି କି

ଫେରେଇ ଦେଲ ମୋତେ

କଟୁକଥା କହି....!

ଅଳ୍ପକେ ସନ୍ତୁଷ୍ଟ ମଣିଷ ମୁଁ

ବଢେଇଥିଲି କି ଆକାଶକୁ ହାତ !

ଚାହିଁଥିଲି କି ଉଡିବାକୁ ଛିଟ ଛାୟାପଥ !

ଯାଚନା କରିଥିଲି ତ ମାତ୍ର

ତୁମ ଉତ୍ତରଣ ଖଣ୍ଡେ

ଯାହା ମୋତେ ହେଲାନି ପ୍ରାପତ

ମୁଁ କ'ଣ ବସେଇଥିଲି 

ତୁମେ ହାତେଇଥିବା ସମ୍ପତ୍ତିରେ ଭାଗ !

କୁହ ତେବେ 

ତଥାପି କାହିଁକି ଏତେ ରାଗ...!

ମାଗିଥିଲି ତ ଆଲୁଅ ପାଇଁ ଆଞ୍ଜୁଳାଏ ଖରା

ରାତି ଅନ୍ଧକାର ପାଇଁ ପୁଞ୍ଜିଏ ତାରା 

କୋମଳ ଜୋଛନା ପରି ତୁମ ଦରଦୀ ମନ

ବେଶୀ କ'ଣ ମାଗିଦେଲି ଯେ

ଚାଲିଗଲ ମୁହଁ ଫେରାଇ 

ସଦର ଦରଜା ବନ୍ଦ କରିଦେଇ ।

ତଥାପି, ମୁଁ ମୋର ଇଶ୍ଵର ଦତ୍ତ 

ସୀମାରେଖାରେ ଠିଆ ହୋଇ

ପ୍ରାର୍ଥନା କରୁଛି 

ତୁମକୁ ସବୁ ସୁଖ ମିଳୁ

ତୁମର ମଙ୍ଗଳ ହେଉ,

କେଉଁ ଷଡ଼ଯନ୍ତ୍ରରେ ନାହିଁ 

ମୋର ଏତିକି ମାଗୁଣି

ଚାହୁଁଛି ଅନ୍ତଃକରଣରେ 

ତୁମଠି ସଦବୁଦ୍ଧି ଜାଗ୍ରତ ହେଉ...।।