ଜନ୍ମ ଦିନ
ଜନ୍ମ ଦିନ
ଜନ୍ମ ଦିନ ଏକ ଶୁଭ ଦିନ ଅଟେ
ଆଶିଷ ନେବାର ପାଇଁ,
ଗୁରୁ ଗୁରୁଜନ ଙ୍କର ଆଶିଷ ନିଅନ୍ତି
ଚରଣ ତାଙ୍କର ଛୁଇଁ l
ମାଆ କରିଥାଏ ଷଠି ଦୁଶୀ ପୂଜା,
ପ୍ରଦୀପ ଥାଏ ସେ ଜାଳି
ଭୋଗ କରିଥାଏ ଷଠିମାଆ ପାଶେ
ସାତଟି ସରୁ ଚକୁଳି l
କଳସ ବସାଇ ପିଲାକୁ ବନ୍ଦାନ୍ତି
ବୁଢୀମା ଅବା ଆଈ,
ଜ୍ୟେଷ୍ଠ ଶ୍ରେଷ୍ଠ ପରମ୍ପରା ଆମ
ସଂସ୍କୃତି ର କଥା ଏଇ l
ସତ୍ୟନାରାୟଣ ମେଳା ହୋଇଥାଏ
ବ୍ରାହ୍ମଣ ପଢ଼ନ୍ତି ବହି,
ଷୋଳ ବର୍ଷ ଯାଏ ଵିଧି ଏହାପରା
ଆମର ଯାଇଛି ରହି l
ସାଇପଡିଶାରେ ଭୋଗ ବଣ୍ଟା ହୁଏ
ଆନନ୍ଦିତ ସର୍ବ ମନ
ପିଲାଟିକୁ ସର୍ବେ କଲ୍ୟାଣ କରନ୍ତି
ଏହିତ ଵିଧି ବିଧାନ l
ପ୍ରଶ୍ଚାତ୍ୟ ସଭ୍ୟତାଅନୁକରଣ ରେ
କେକ କାଟିବାର ଯୁଗ,
ମହମବତୀ କୁ ଜାଳି ଫୁଙ୍କିଥାନ୍ତି
ବିଚିତ୍ର ଜୀବନ ଭୋଗ l
ସାଙ୍ଗସାଥି ମେଳେ ବେଲୁନ ଟଙ୍ଗାଇ
ଫୁଟାଇ ଥାଆନ୍ତି ତାକୁ
ଢ଼ୋ ଢା ଶବ୍ଦ ନାଚ ଗୀତ ଗାଇ
ମାନନ୍ତି ଜନ୍ମ ଦିନକୁ l
ଈଶ୍ୱର କରନ୍ତୁ ଆମ ପରମ୍ପରା
ଆଉଥରେ ଆସୁ ଫେରି,
ଆଶିଷ ଲଭନ୍ତୁ ପିଲାମାନେ ଆମ
ନମ୍ରତା କୁ ଶିକ୍ଷା କରି l