ଲୋକହସା
ଲୋକହସା
ଲୋକହସା କାମ କରିବ କାହିଁକି
ଲୋକେ ତ ନିଶ୍ଚେ ହସିବେ ।
ଲୋକହସା ହେଲେ ଲାଗିବ କି ଭଲ
ଏ କଥାଟିକି ଭାବିବେ ।୧।
ଲୋକଙ୍କ ପାଟିରେ ବାଡ ବତା ନାହିଁ
ସଜ ମାଛରେ ସେ ପୋକ ।
ପକାଇ ଥାଆନ୍ତି ଥୋକେ ଆଉ ଥୋକେ
ଲାଗନ୍ତି ଯେସନେ ଯୋକ ।୨।
ଭଲ କାମ ଲୋକେ ଦେଖିଲେ କାହାର
କେହି ପ୍ରଶଂସା କରନ୍ତି ।
ଆଉ କିଛି ଲୋକ ନୀରବ ରହନ୍ତି
କେବେ କିଛି ନ କହନ୍ତି ।୩।
ଗୋଡ ଟାଣିବାଟା କିଛି ଲୋକଙ୍କର
ଅଭ୍ୟାସ ହୋଇଛି ଏବେ ।
ଭଲ କଥା କାମ ନ କରିବେ ସିଏ
ଅନ୍ୟର ଗୋଡ ଟାଣିବେ ।୪।
ନିଜେ ପଛେ ସିଏ ଲୋକହସା ହେବେ
ତହିଁକି ଖାତିରି ନାହିଁ ।
ଅନ୍ୟକୁ ସେ ଲୋକହସା କରାଇବେ
ସେଥିକି ଟାକନ୍ତି ରହି ।୫।
ଦୁର୍ଜନ ଚରିତ୍ର ହୁଅଇ ଏପରି
ମାଛି ପରି ତାଙ୍କ କାମ ।
ସୁଜନ ଭାବନ୍ତି ଲୋକହସା ହେଲେ
ସତେ ନେଲା ତାଙ୍କୁ ଯମ ।୬।
ମରଣଠୁ ଦୁଃଖ ଅଧିକ ହୁଅଇ
ଲୋକହସା ଯଦି ହେଲା ।
ମରିଲେ ଲୋକର ସରିଗଲା ଦୁଃଖ
ବଞ୍ଚି କଲବଲ ହେଲା ।୭।
ଯିଏ ଯାହା ନୁହେଁ ତାହା ହେବା ପାଇଁ
ଅନ୍ୟକୁ ନକଲ କଲେ ।
ଲୋକହସା ହୁଏ ନିଶ୍ଚିତ ଭାବରେ
ସନ୍ଦେହ ନାହିଁଟି ତିଳେ ।୮।
ଯେତିକି ମିଳିଛି ପ୍ରଭୁଙ୍କ କୃପାରେ
ସନ୍ତୋଷ ଲଭ ସେଥିରେ।
ଲୋକହସା କେବେ ନ ହୋଇବ ତୁମେ
ରହିଥିବ ଆନନ୍ଦରେ ।୯।