ଅପେକ୍ଷା
ଅପେକ୍ଷା
ଜୀବନର ସବୁ କ୍ଷେତ୍ରରେ ଆମର
ଅପେକ୍ଷା ରୁହଇ କେତେ ,
କେବେ ସାଙ୍ଗ ସାଥି ଅବା କେଉଁ ଗାଡି
ଅପେକ୍ଷା ରେ ରହୁ ପଥେ l
ପ୍ରତି ପରୀକ୍ଷାର୍ଥୀ କରନ୍ତି ଅପେକ୍ଷା
ପରୀକ୍ଷାର ଫଳ ପାଇଁ
ସୁଫଳପ୍ରାପ୍ତିରେ ଖୁସିକୁ ମନାନ୍ତି
ହାରିଲେ ହୃଦ ଭାଙ୍ଗଇ l
ଗରମ ଲୁହା କୁ ଆଘାତ ଯେସନେ
ଆକୃତି ସେ ବଦଳାଏ,
ଅପେକ୍ଷା ନକରି ତରବର ହେଲେ
ଶ୍ରମ ବୃଥା ହୋଇ ଥାଏ ll
ସମୟାନୁସାରେ ସବୁ ମିଳିଥାଏ
ଯେସନେ ପାଚିଲାଫଳ,
ଅପେକ୍ଷା ନକରି ଆଗରୁ ତୋଳିଲେ
କଞ୍ଚା ସେ ମିଳେ କେବଳ l
ମାଟି ତଳେ ମଞ୍ଜି ଅପେକ୍ଷା କରଇ
ଚାରା ଟିଏ ହେବା ପାଇଁ,
ଜଳ ବାୟୁ ଆଉ ଉତ୍ତାପ ପାଇଲେ
ଅଙ୍କୁରିତ ହୋଇଥାଇ l
ଅପେକ୍ଷା କରିବା ଧୈର୍ଯ୍ୟ ଆଜିକାଲି
କାହାର ପାଖରେ ନାହିଁ
ତରବର ହୋଇ କାମ କରୁଥାନ୍ତି
ବ୍ୟସ୍ତ ଓ ବିବ୍ରତ ହୋଇ l
ଧୈର୍ଯ୍ୟ ଧରି ସଦା ଅପେକ୍ଷା କରିବା
ଉଚିତ ଜୀବନେ ତଟେ,.
ଅନୁକୂଳ ଅବସର ଆସିଗଲେ
ସୁଫଳ ମିଳଇ ହାତେ l
ଅପେକ୍ଷା ର ଫଳ ମିଠା ହୋଇଥାଏ
କହିଥାନ୍ତି ସୁଧୀ ଜନ,
ଭାବି ଚିନ୍ତି ସବୁ କାମ କରୁଥିଲେ
ଚିନ୍ତା ଯାଏ ଦୂରେ ଜାଣ ll
ସମୟ ତ କେବେ ଅପେକ୍ଷା କରେନା
ଗଡ଼ିଚାଲେ ଅବିରତ,
ଅନ୍ତ କାଳ ପାଇଁ ଅନନ୍ତ ପ୍ରତୀକ୍ଷା
ନହୁଅ ରେ ବିଚଳିତ l
ଆତ୍ମା ଦେହେ ରହି କରଇ ଅପେକ୍ଷା
ପରମାତ୍ମା ସଙ୍ଗ ପାଇଁ,
ଅନ୍ତକାଳ ହେଲେ ସୁଯୋଗ ଆସଇ
ମିଶେ ସିଏ ନିଜେ ଯାଇ l