ରହସ୍ୟ
ରହସ୍ୟ
ରହସ୍ୟ ମୟ ଏ ଜଗତର ସୃଷ୍ଟି
ସହଜେ ହୁଏନି ବୁଝି,
ପୃଥିବୀ ଗ୍ରହରେ କେତେ ଜାତି ଜୀବ
ପ୍ରଭୁ ଦେଇଛନ୍ତି ସୃଜି ।
ସବୁ ଜୀବ ପାଇଁ ଖାଦ୍ୟ ଖଞ୍ଜିଛନ୍ତି
ଯିଏ ଖୋଜେ ଯେଉଁମତେ,
କିଏ ରହେଜଳେ କିଏ ସ୍ଥଳେ ପୁଣି
କେ ଉଡେ ଆକାଶ ପଥେ ।
ମଞ୍ଜି ରୁ ହୁଅଇ ବିରାଟ ଉଦ୍ଭିଦ
ଅଣ୍ଡା ଟି ଭିତରେ ଜୀବ
ଶାମୁକା ଭିତରେ ମୋତି ର ସୃଷ୍ଟି
ଚକିତ ଦେଖି ସରବ ।
ମୃଗ ର ନାଭିରୁ କସ୍ତୁରୀ ର ସୃଷ୍ଟି
ଗାଇ ଦେହେ ଗୋରଚନା,
ଗଜ ମାଥେ ଥାଏ ଗଜର ମୁକୁତା
ବିଚିତ୍ର ସବୁ ସର୍ଜନା ।
ସର୍ପ ର ମଥାରେ ମଣି ରହିଥାଏ
କୋଇଲା ରୁ ହୀରା ସୃଷ୍ଟି,
ବିଚିତ୍ର ମୟ ଅଟେ ଏ ସଂସାର
ଗଢିଛନ୍ତି ପରମେଷ୍ଟି ।
ପୃଥିବୀ ଘୁରୁଛି ସୂର୍ଯ୍ୟ ଚାରିପଟେ
ପୁଣି ଗ୍ରହ ଉପଗ୍ରହ,
ଅଦୃଶ୍ୟ ଶକ୍ତିର ଇଙ୍ଗିତେ ଘୁରନ୍ତି
ଲାଗଇ ସବୁ ବିସ୍ମୟ ।
ଏକା ଦିନେ ଜାତ ହୋଇଲେବି ଶିଶୁ
ଅଲଗା ରୂପ ଓ ଗୁଣ,.
କିଏ ରାଜା ଘରେ ଜନ୍ମ ହେଲା ବେଳେ
କେ ଦୁଃଖେ କାଟେ ଜୀବନ ।
ବୁଝି ନପାରି ଏ ବିଚିତ୍ର ବିଶ୍ୱକୁ
ଯୋଡି ଦେଉ ଆମେ କର,
ସକଳ ସୃଷ୍ଟିର ମୂଳରେ ତ ତୁମେ
ହେ ପ୍ରଭୁ ପରମେଶ୍ୱର ।