ଜୀବନର ମୂଳମନ୍ତ୍ର

 ନୂତନ ଯୁଗର  ମଙ୍ଗଳ ପ୍ରଭାତେ

      ସ୍ବର୍ଣ୍ଣାଭ ପୂର୍ବ ଦିଗନ୍ତ

ସୌର ବାୟୁ ଶକ୍ତି ଉତ୍ତମ ପ୍ରୟୋଗେ

       ଜୀବନ ସ୍ୱଚ୍ଛନ୍ଦ ମୁକ୍ତ ।

ପ୍ରକୃତିର ଦାନ  ସୂର୍ଯ୍ଯଙ୍କ କିରଣ

      ସ୍ୱଚ୍ଛନ୍ଦ ବାୟୁ ପ୍ରବାହ 

 ଥିଲେ ପରିବେଶ  ସବୁଜ ସୁନ୍ଦର 

      ଜୀବନ ଆନନ୍ଦମୟ ।

 ହାଣିବାନି ଗଛ  ଜାଳିବାନି କାଠ

      ପରିବେଶ ହେବ ସ୍ବଚ୍ଛ 

 ଅଙ୍ଗାରକ ଅମ୍ଳ  ଜାଳେଣିର ଧୂଆଁ

      ବିଷାକ୍ତ ଅଟେ ଦୂଷିତ ।

ଆସ ଆହରିବା ପ୍ରଯୁକ୍ତି କୌଶଳ

      ଶକତିର ନୂଆ ଉତ୍ସ

ସୂର୍ଯ୍ଯ ଅସରନ୍ତି  ଶକ୍ତିର ଭଣ୍ଡାର 

      ଅଟେ ପ୍ରଦୂଷଣ ମୁକ୍ତ ।

ସମୁଦ୍ରର କୂଳେ  ବିସ୍ତୀର୍ଣ୍ଣ ପ୍ରାନ୍ତରେ

      ଅଥବା ପର୍ବତ ଶିଖେ

ଉପଲବ୍ଧ ହୁଏ  ସହଜେ ବିଦ୍ୟୁତ 

      ବସାଇ ପବନ ଚକ୍ରେ ।

ଜୈବିକ ଇନ୍ଧନ  କୋଇଲା ପେଟ୍ରୋଲ 

      ବୃଦ୍ଧି କରେ ପ୍ରଦୂଷଣ

ସ୍ବଚ୍ଛ ଶକତିର  ଉପଯୋଗ ପାଇଁ

      ସମୟ ଦିଏ ଆହ୍ୱାନ ।

ଅସରନ୍ତି ଅଟେ  ସୌର ବିକିରଣ 

      ବାୟୁ ସଞ୍ଚାଳନ ଗତି

ବିକଶି ପ୍ରବିଧି   ଆହରିବା ଶକ୍ତି

      ଦୂଷଣୁ ଲଭିବା ମୁକ୍ତି ।

ପ୍ରବହୁ ସ୍ବଚ୍ଛନ୍ଦେ  ମୁକ୍ତ ସମୀରଣ

     ବିକଶୁ କିରଣେ ଶକ୍ତି

ମହାନ ଭାରତେ ହେଉ ନବନ୍ମେଷ 

     ସତ୍ଯ ଶାନ୍ତି ସମୁନ୍ନତି ।

ଯତ୍ନ କରି ଆସ  ଲଗାଇବା ଗଛ

     ଜୀବନେ ନେବା ଶପଥ

ଉପଯୋଗ କରି  ସୌର ବାୟୁ ଶକ୍ତି

     ରଖିବା ପ୍ରକୃତି ସ୍ବଚ୍ଛ ।