ଝରକା ପାଖର ବର୍ଷା

ଆଜି ପୁଣି ବର୍ଷୁଛି ପାଣି

ଝରକା ଏ ପାଖେ ବି

ଝରକା ସେ ପାଖେ ବି ,

ଝରକାର ଏ ପାଖରେ

କିଛି ଲୁହର ବନ୍ୟା

ଝରକାର ସେ ପାଖରେ

କିଛି ବର୍ଷାର ବେଦନା ,

ଗୋଟେ ପଟେ 

ନୀରବତାର ମୃଦୁ ଗର୍ଜନ ,

ଆଉ ଗୋଟେ ପଟେ

ଚଞ୍ଚଳା ଚପଳା ସହ ଖେଳୁଥିବା

ଘଡ଼ଘଡ଼ିର ତାଣ୍ଡବ ,

ଝରକାର ଏପାଖରେ 

ଆଖିରେ ପାଣି

ଝରକାର ସେପାଖରେ

ବର୍ଷାର ପାଣି ,

ରାତି ବଢିବା ସହ

ବଢୁଥାଏ ବର୍ଷାର ତୀବ୍ରତା

ବଢେ ମୋ ମନ ଭିତରର ଶୂନ୍ୟତା

ଖାଲି ଖାଲି ଘରେ

ଝରକା ପାଖ ଯାଗାଟା 

କାହିଁକି କେଜାଣି ନିଜର ଲାଗେ ,

ଝରକାର ସୀମା ଶେଷେ 

ଆରମ୍ଭ ହୁଏ ଦୂର ଆକାଶର ସୀମା ,

ଏ ଆକାଶ ଟା 

ବୁଝିପାରେ ବୋଧହୁଏ 

ମୋ ମନ ଯେତେ ସବୁ

ଅକୁହା ଯନ୍ତ୍ରଣା ,

ସେଥିପାଇଁ ମୋ ସହ ତାଳ ଦେଇ

ସେ ବି ଲୁହ ଝରାଏ ,

ବର୍ଷାର ପ୍ରତିଟି ବୁନ୍ଦା 

ମୋତେ ଛୁଇଁ ଦେଇ,

ମୋ ଶୂନ୍ୟତାକୁ ପୂର୍ଣ୍ଣ କରେ

ଅନ୍ତରଙ୍ଗ ନିବିଡ଼ତାରେ ,

ଝରକା ବାଟେ ଆସି

ଚୁପ୍ ଚାପ୍ ସାନ୍ତ୍ବନା ଦିଏ ମୋତେ

କାନେ କହିଦେଇ ଯାଏ,

କେବଳ ଗୋଟେ କଥା 

ବଦଳିଯିବ ଏ ସମୟ ,

ଜୀବନରେ ପୁଣି ବହିବ ମଳୟ ,

ଆନମନା ଶ୍ରାବଣୀର

କୋପ ବନ୍ୟା କ'ଣ କେବେ !

ରୋକି ପାରିଛି କି

ଶୁଭ୍ର ଶରତର ଆଗମନକୁ !!!

ଆକାଶ ତ ଦିନେ ନିର୍ମଳ ହେବ

ଅପସରି ଯିବ ଘନ ବାଦଲର 

କଳଙ୍କ ସାମ୍ରାଜ୍ୟ ,

ପୁଣି ବିଜେ କରିବ ଶାରଦୀୟ ଶୁଭ୍ରତା,

ପ୍ରତୀକ୍ଷା ତ କେବଳ ସମୟର ;

ଏ ପ୍ରତୀକ୍ଷା ଅଛି ଆଜି

କିଛି ଝରକାର ଏ ପାଖରେ

ଆଉ କିଛି

ଝରକାର ସେପାଖରେ ,

କିଛି ମୋ ହୃଦୟର ଲୁହରେ

ଆଉ କିଛି

ବର୍ଷାର ଅଦେଖା କୋହରେ ।