ମହାମାରୀ ଆତଙ୍କ
ମହାମାରୀ ଆତଙ୍କ
କରୋନା କୋକୁଆ କବଳରେ ବିଶ୍ୱ
ଆତଙ୍କ ଖେଳୁଛି ଖେଳ ।
ଜନ ସମାଜରେ ଭୟ ବିଭୀଷିକା
ସରିବ କି କଳିକାଳ !୧!
ହୃଦୟକୁ ଘାରେ ଅକାଳ ମରଣ
କରୋନା କାରଣ ପାଇଁ ।
ଭୁତାଣୁ ରାକ୍ଷସ କାୟା ବିସ୍ତାରୁଛି
ମହାମାରୀ ରୂପ ନେଇ ।୨।
ଅଜବ ଗୁଜବ ଅଜଣା ଆଶଙ୍କା
କରୋନା କରୁଛି ସୃଷ୍ଟି ।
ପ୍ରଚାର ମାଧ୍ୟମ ଟିଭି ମୋବାଇଲି
ଆକର୍ଷଣ କରେ ଦୃଷ୍ଟି ।୩।
ପ୍ରଚାର ପ୍ରସାରେ ଭୟର ସଂଚାର
ପ୍ରତିକାର ପାଇଁ ବ୍ୟସ୍ତ ।
ମାନବ ସମାଜ ହୁଏ ସଜବାଜ
ରହିବ କିପରି ସୁସ୍ଥ ।୪।
ସ୍ୱାସ୍ଥ୍ୟ ସେବାସଂସ୍ଥା କରୁଛି ବ୍ୟବସ୍ଥା
ଶାସକ ନିର୍ଦ୍ଦେଶ ମାନି ।
ସ୍ରଷ୍ଟାର ସୃଷ୍ଟିକୁ ହେୟାଜ୍ଞାନ କରି
ଭାବୁଛି ନିଜକୁ ଜ୍ଞାନୀ ।୫।
ଅଦୃଶ୍ୟ ଭୁତାଣୁ ପ୍ରତିହତ ପାଇଁ
ଅନ୍ଧାରେ ବୁଲାଇ ବାଡ଼ି ।
ପ୍ରତିରକ୍ଷା ପାଇଁ ପ୍ରୟାସ କରୁଛି
କରୋନାକୁ ଦେବ ତଡି ।୬।
ଅଚ୍ୟୁତ ମାଳିକା ନୁହେଁ ପ୍ରହେଳିକା
ଭାବୁଛନ୍ତି ଏବେ ଜନେ ।
ଅଦ୍ଭୁତ କୋକୁଆ ସତରେ ଆସିଛି
କଳ୍ପନା ଜାଗୁଛି ମନେ ।୭।
ବିଜ୍ଞାନ ବଳରେ ବିଶ୍ୱ ବଳିୟାନ
ଦେଖାଇ ନିଜର ବଳ ।
ସୃଷ୍ଟି ବିରୁଦ୍ଧରେ ଯୁଦ୍ଧ ଡ଼ାକରାରେ
ଫଳିଲା କରୋନା ଫଳ ।୮।
ଚେତନା ପଶିଲେ ହୃଦରେ ଏବେ
ଲାଭ କିବା ହେବ ଆଉ ।
ନିଜ ପାଇଁ ନିଜେ ଯମକୁ ଡାକିଲେ
ଯମ ହିଁ ସାଧିବ ଦାଉ ।୯।
ମାନବ ଜନମ ଦୁର୍ଲଭ ହେଲେ ବି
ସାରା ଜୀବଜଗତରେ ।
ସୃଷ୍ଟି କର୍ତ୍ତା କେବେ ରାୟ ଦେଇନାହିଁ
ନିଷ୍ଠୁରତା ସପକ୍ଷରେ ।୧୦।
ଆମ ନିଷ୍ଠରତା ଜୀବଜନ୍ତୁ ହତ୍ୟା
ନିଜର ଲାଳସା ପାଇଁ ।
ପରିବେଶ ନଷ୍ଟ ପ୍ରକୃତି କ୍ରୋଧରେ
ସବୁ ଯିବ ଧ୍ବଂସ ହୋଇ ।୧୧।
କାହିଁ କେତେ ଦିନୁ ଅନେକ ଭୁତାଣୁ
ଆନ୍ଥ୍ରାକ୍ସ ନାଇଲ୍ ସର୍ସ ।
ମୃତ୍ୟ ବିଭୀଷିକା ରଚି ଯାଇଛନ୍ତି
ବସାଇ ତାଙ୍କର ଫାଶ ।୧୨।
ତା'ପରେ ଆସିଛି ବାର୍ଡଫ୍ଲୁ ଇକୋଲି
ସ୍ୱାଇନିଫ୍ଲୁ ଓ ଇବୋଲା ।
ଇସି ଜିକା ନିପ୍ପା ପର୍ଯ୍ୟାୟ କ୍ରମରେ
ରଚିଛନ୍ତି ନାଶ ପାଲା ।୧୩।
ଦଶନ୍ଧି ବିତିଲା ଅପ୍ରତ୍ୟକ୍ଷ ହୋଇ
ମାନବ ରହିଛି ଶୋଇ ।
ଏକବିଂଶ ଅବ୍ଦେ କରୋନା ଆସିଛି
ସତର୍କତା ବାର୍ତ୍ତା ନେଇ ।୧୪।
ବୁଲି ବୁଲି କହେ ଜାଗ ହେ ମାନବ
ନିଷ୍ଠୁରତା ପଣ ତେଜି ।
ଜୀବେ ଦୟାବହି ପରିବେଶ ପାଇଁ
ଧର୍ମ କର୍ମେ ଯାଅ ମଜ୍ଜି ।୧୫।
ସ୍ୱଚ୍ଛତା ଅସ୍ତ୍ରରେ ପରାଜୟ ମୋର
ପରିବେଶ ରଖ ସ୍ଵଛ ।
ଫେରିଯିବି ମୁହିଁ ପ୍ରକୃତି କୋଳକୁ
ସମସ୍ତେ ରହିବା ସୁସ୍ଥ ।୧୬।