ଜହ୍ନର ଠିକଣା

କୁଆଁରୀ ମନର ମୁଠା ମୁଠା ସ୍ବପ୍ନ

କଳ୍ପନା ସିନ୍ଧୁକେ ରଖି

ଜହ୍ନର ଠିକଣା ଖୋଜଇ ରାତିରେ

ପ୍ରୀତିର ପୀୟୂଷ ମାଖି ।

ଦୁଇପକ୍ଷ ସଦା ଆଗପଛ ହୋଇ

ଆସନ୍ତି ବିଧିର ବଳେ

ପୁନେଇଁ ଚାନ୍ଦର ବାହୁ ବଳୟରେ

ଝୁମନ୍ତି ଜୋଛନା କାଳେ ।

ଆକାଶ ବକ୍ଷରେ ରୂପେଲି ଜହ୍ନଟି

ଶୁଭ୍ରତାରେ ହସୁଥାଇ

ପାହାନ୍ତା ପ୍ରହରେ ଠିକଣା ଖୋଜଇ

ଆନମନା ପ୍ରିୟା ହୋଇ ।

ପ୍ରୀତିର ଅନନ୍ୟା ସପନ ଝୁଲଣା

ତୋଳିବ ଜହ୍ନରେ ଘର

ଆକାଶର ଚାନ୍ଦ ଲୁଚିଛି ବାଦଲେ

ଲୁଚକାଳି ଖେଳ ତାର ।

ଅବୁଝା ମନକୁ ବୁକୁ ତଳେ ଚାପି

ସତେକି ସମାଧି ଲଗ୍ନା

ନୀଳ ନୀଳିମାର ବିସ୍ତୃତ ଶଯ୍ୟାରେ

ଅନ୍ୱେଷଣେ ସ୍ମୃତିପର୍ଣ୍ଣା ।