ରହସ୍ୟ

ଜଗନ୍ନାଥ ସଂସ୍କୃତି ରହସ୍ୟ ଭେଦ

ଗବେଷଣା ଅଛି ଜାରି

ପ୍ରଭୁ ପରଂବ୍ରହ୍ମ ମୋହିନୀ ମାୟା ରେ

ଭକତର ଭାଵ ଭାରି ।

ଅଜଣା ରହିଲା ମାତାର ନାମଟି

ରହସ୍ୟମୟ ଜୀବନ

କେଉଁ ଅପରାଧେ ଅବରୋଧ ହେଲି

ପ୍ରତି କ୍ଷଣ ଅପମାନ ।

ପଞ୍ଚ ଇନ୍ଦ୍ରିୟ ସାଥେ ଶରୀର ପ୍ରାଣ

ଚଳ ଚଞ୍ଚଳ ଚିନ୍ତନ

ଭୂମାରୁ ଅନ୍ତରୀକ୍ଷ ଭ୍ରମୁଥାଏ ତ

ରହସ୍ୟ ଘେରରେ ମନ ।

ବିଦେଶରେ ଜନର ହୋଇଲେ ମୃତ୍ୟୁ

ସଭିଏଁ ଶୁଣି ଥାଆନ୍ତି

ଜନନୀ ଝୁରଇ ଅନ୍ତିମ ପର୍ଯ୍ୟନ୍ତ

ସନ୍ଦେହେ ମନ ବୁଝାନ୍ତି ।

ରହସ୍ୟ ଶବ୍ଦଟି ଏପରି ଜହର

ବିଚଳିତ ମନ ମଧ୍ୟେ

ଭୁଲବୁଝାମଣା ରହସ୍ୟ ସିନ୍ଧୁକେ

ବିପଦ ଜୀବନ ବନ୍ଧେ ।

ଯାହାର ଇଚ୍ଛାରେ ପ୍ରଭାତରେ ରବି

ସଞ୍ଜ ଚାଲିଯାଏ ନଇଁ

ପ୍ରତି ଜୀବକୋଷେ ସତ୍ତା ଅନୁଭବେ

ରହସ୍ୟ ଜୀବନ ସେଇ ।

ଜୀଵତତ୍ତ୍ୱ ଠାରୁ ସାଧନା ତତ୍ତ୍ୱରେ

ବହୁ ଅଲୌକିକ ଥାଏ

ସଂସାର ଜୀବନେ ସଂଘର୍ଷ ପଥଟି

ରହସ୍ୟମୟେ ବିତାଏ ।

କାହାର ଜୀବନେ ଦୁର୍ଘଟଣା ଘଟେ

ଲୁକାୟିତ ରହିଯାଏ

କାହାପାଇଁ ପୁଣି ଦୋଷୀ ଧରାପଡେ

ଜୀବନଟି ହାରି ଥାଏ ।

ସୃଷ୍ଟିର ମଞ୍ଚରେ ଭିନ୍ନ ଅଭିନୟେ

ସମୟ ସ୍ରୋତର ସ୍ମୃତି

ରହସ୍ୟ ଘେରରେ ଏ ଜୀଵ ଜଗତ

ମହାଶୂନ୍ୟେ କର୍ମ କୀର୍ତ୍ତି ।