ଈଶ୍ୱର ଏକା ସତ୍ୟ
ଈଶ୍ୱର ଏକା ସତ୍ୟ
ଅଶାନ୍ତି ଅଗ୍ନିରେ କୁହୁଳେ ଜୀବନ
ତଥାପି ଆମେ ନୀରବ
କରିବାକୁ ଅଧର୍ମୀଙ୍କୁ ବିରୋଧ
ଡରାଏ ଆମ ବିବେକ l
ସତ୍ୟ ଦେଖିବୁନି ସତ୍ୟ ଶୁଣିବୁନି
ସତ୍ୟ କେବେ କହିବୁନି.
ନିଜେ ବଞ୍ଚିବାର ନିତି ଆପଣାଇ
କାଦୁଏ ଗୋଡ଼ ଦେବୁନି l
ପଶିଲେ କାଦୁଏ ଧୋଇବାକୁ ହେବ
ଆପଣାର ଦୁଇ ଗୋଡ଼.
ତାହାଠାରୁ ଭଲ ନୀରବ ରହିବା
କିଏ ଖାଉଥାଉ ପଛେ ମାଡ଼ l
ଯାହା ଘଟୁଅଛି ଅଧିକ ଘଟିବ
ଅନ୍ଧକାର ଘୋଟିଯିବ
ବାଟ ତ ନଥିବ ସର୍ବେ ହେବେ ଏକ
ଡାକଦେବେ ନାରାୟଣ ରଖ l
ବ୍ୟାପୁଅଛି ରୋଗ ଦେଉଅଛି ଦୁଃଖ
ଜାଣିପାରୁନି ରୋଗ ବଇଦ
ଓଉଷଧୀ ଆଉ କାମ କରୁନାହିଁ
ବେଳ ଚାଲୁଅଛି ମନ୍ଦ l
ପୁଣ୍ୟ ଆତ୍ମା ଯିଏ ଆଗ ଚାଲିଯିବ
ପାପୀ ପଛକୁ ରହିବ
ପରମାୟୁ ସରିଯାଏ ପିଲା ଚାଲିଯାଏ
ପିତାମାତା ପାଉଛନ୍ତି ଦୁଃଖ l
ଅଧର୍ମୀଙ୍କ ବଳ ବଢିବ ବହୁତ
ଦେଖୁଥିବ ରହି କାଳ
ବେଳ ହୋଇଗଲେ ନିଜ ନିଜ ମଧ୍ୟେ
ହେବେ ସବୁ ମାଡଗୋଳ l
କଳ୍କୀ ନାରାୟଣ କଳ୍କୀ ରୂପ ଧରି
ଘୋଡାରେ ଚଢି ଆସିବେ
ଏ ହାତୁ ସେ ହାତ ବାରହାତ କରି
ଖଣ୍ଡା ପରା ବୁଲାଇବେ l
ପୁଣ୍ୟର କେବେ କ୍ଷୟ ହୁଏ ନାହିଁ
ପାପର ହୁଅଇ ଅନ୍ତ
ଅଧର୍ମ କେବେ ବି ବିଜୟ ଲଭେନି
ଧର୍ମ ସଦା ସଂସ୍ଥାପିତ l
ତାଙ୍କ ଇଚ୍ଛା ଯାହା ସେ ତାହା କରିବେ
କିଏ ସେ ଅଛି ରୋକିବ
କର ଯୋଡି ଡାକେ ରଖ ପ୍ରଭୂ ରଖ
ହେ ପ୍ରଭୂ ପଙ୍କଜ ମୁଖ ll