ପ୍ରଣିପାତ ମା 🙏*************

ନମସ୍ତେ ମା ମହାଲକ୍ଷ୍ମୀ ଶ୍ରୀହରିପ୍ରିୟା

ବିପଦରେ ତୋ ସଂସାର କର ଟିକେ ଦୟା

ମାଗୋ ଅନ୍ନପୂର୍ଣ୍ଣା ଧନ ରତ୍ନ ମୁଁ ଚାହେଁନା

ତୁମ ଚରଣରେ ସୁଖଶାନ୍ତି ମୋ କାମନା

ଅଜ୍ଞାନ ସନ୍ତାନ ମୁହିଁ ମା ତୁମେ ମୋର

ପାରିହେବି ତୋ ଆଶୀଷେ ସଂସାର ସାଗର

ତୋ ପାଦରେ ଗୁହାରି ମା ସାଗର ଦୁଲଣୀ

ସଂସାର ଯାତନା ଦୂରକର କମଳିନୀ

ସଂସାରରେ ଘୋଟିଅଛି ଆଧୁନିକ ଛାପ

ଆପଣାର ଭାବ ନାହିଁ ନୀଚ୍ଚ ମନୋଭାବ

ସଂକୁଚିତ ହୋଇଅଛି ଦୟା କ୍ଷମା ପ୍ରେମ

ବିକୃତ ଆଜି ମସ୍ତିଷ୍କ ସ୍ୱାର୍ଥର ଶାସନ

ଅହଂକାରକୁ ମଣିଷ ନିଜ ସାଥୀ କରି

ପିୟୁଷ ବଦଳେ ମନୁ ବିଷ ଯାଏ ଝରି

ଅନ୍ତରେ ଜ୍ୱଳନ ଆଜି ଲୁହ ମୂଲ୍ୟହୀନ

ମିଛ ଅଭିନୟେ ଖାଲି ବିତୁଛି ଜୀବନ

ଚାରିଆଡେ ଉଡୁଅଛି ସନ୍ଦେହର ଝୁଲ

ଅସହ୍ୟ ବ୍ୟଥା ଯନ୍ତ୍ରଣା କରେ କଲବଲ

କଣ୍ଟକିତ ପଥ ଆଜି ଜୀବନଟା ଦୁଃସ୍ଥ

ଚାରିଆଡେ ତ ଅନ୍ଧାର ସ୍ବପ୍ନ ଉପେକ୍ଷିତ

ତଥାପି ମା ଦିସୁଅଛି ଆଶାର କିରଣ

ଝରି ପଡ଼ୁ ମୋ ମା'ର କରୁଣା କୁସୁମ

ଜଗତ କଲ୍ୟାଣୀ ମା ଘେନ ପ୍ରଣିପାତ

ଶରଣ ତୋ ଶ୍ରୀପୟରେ ଦିଅ ଆଶୀର୍ବାଦ

କ୍ରୋଧ କରିବନି ତୁମେ ମା କ୍ଷମାମୟୀ

ମଥାପରେ ଥାଉ ତୁମ ପଦ୍ମହସ୍ତ ଦୁଇ ।