ହରିହର ବେଶ

ଶିବ ବିଷ୍ଣୁଙ୍କର ହୃଦୟେ ବିଷ୍ଣୁ ଶିବ ହୃଦୟେ

ନିବାସ କରନ୍ତି ଗୋଟିଏ ଆତ୍ମା ସିନା ଉଭୟେ ।

ଅଭେଦ ମୂରତି ଉଭୟେ ନାହିଁତ ପରାପର

ବଡ଼ଠାକୁର ବଳଭଦ୍ର ସ୍ବୟଂ ହି ହରିହର ।

ଶ୍ରୀକଣ୍ଠାଦି ନ୍ୟାସ ହୁଅଇ ବାସୁଦେବ ମନ୍ତ୍ରରେ

ପୂଜନ ହୁଅଇ ତାଙ୍କର , ହରିହର ବେଶରେ ।

କାର୍ତ୍ତିକ ମାସ ଦୀପାବଳି ପରେ ଦଶମୀ ଯାଏଁ 

ସବୁ ସୋମବାର ପ୍ରଭୁଙ୍କର ଏ ବେଶଟି ହୁଏ ।

ଅବକାଶ ନୀତି ବଢିଲେ ଏ ହରିହର ବେଶ

ପ୍ରଭୁ ବଳଭଦ୍ର ହୁଅନ୍ତି ଲାଗେ ସ୍ଵର୍ଣ୍ଣ ବିଶେଷ ।

ଶ୍ରୀଅଙ୍ଗରେ ଅଧା ଧବଳ ଅଧା କୃଷ୍ଣ ବସନ

ସଜ୍ଜିତ ହୋଇ ବଳଭଦ୍ର ଦିଅନ୍ତି ଦରଶନ ।

ଚିତ୍ତାକର୍ଷକ ଏ ବେଶରେ ସୁବର୍ଣ୍ଣ ନଳିଭୁଜ

କର୍ଣ୍ଣରେ କୁଣ୍ଡଳ ଲାଗଇ ସୁବର୍ଣ୍ଣ ଚନ୍ଦ୍ର ସୂର୍ଯ୍ୟ ।

କଟିରେ ଓଡ଼ିଆଣି ଲାଗେ ପିନ୍ଧି ସୁବର୍ଣ୍ଣ ମାଳି

ଭକତ ହୃଦୟ ତୋଷନ୍ତି ପ୍ରଭୁ ଦିଶନ୍ତି ଝଳି ।

ବାଳଧୂପ ଯାଏଁ ପ୍ରଭୁଙ୍କର ଏ ବେଶଟି ରହେ

ଶିବ ବିଷ୍ଣୁଙ୍କ ସମନ୍ୱୟ ହରିହର ବେଶ ଏ ।