ହଜିଯାଇଛି ଆଜି

ମାଟିର ସେଇ ଘର ଅଗଣା, 

ଚାଳ ଛପର ଘର,   

ହଜିଯାଇଛି ଆଜି ସେ ସବୁ,             

କାଠ ଝରକା ଦ୍ୱାର |   

କଳଙ୍କିଲୁହା ରଙ୍ଗେଇ ହୋଇ,            

ଶୋଭା ବଢାଏ ମହଲ,     

ଘର ଭିତରେ ପ୍ଲାଷ୍ଟିକ ଦ୍ୱାର,             

ତଳ ଟାଇଲ ମାର୍ବଲ |     

କାଠ ଚୁଲି ଓ ନିଆଁର ସେକ            

ବାଜେନି ଦେହେ ଜମା,      

ଫୁଙ୍କୁନଳାକୁ ଛାଡିଣ ଏବେ,             

ପ୍ରାଣାୟାମ କରେ ନନା |     

ଗ୍ୟାସ ରାନ୍ଧଣା ସୁଆଦ ମାରି,             

ଗ୍ୟାସ କରାଏ ସିନା,      

ମାଟିହାଣ୍ଡିର ଶକତି ଖାଦ୍ୟ,            

ଆଉ ଜମା ମିଳେନା |      

ପୋଡା ବାଇଗଣ, ଆଳୁ ଭରତା,           

ପାଟିରୁ ଗଡେ ଲାଳ,       

ଘଷି ପାଉଁଶ, ମିଳେନି ଖତ,             

ମଡ଼ର୍ଣ୍ଣ ହେଲା କାଳ |      

ହଜିଯାଇଛି ଘୋରଣା ଚକି,             

ପେଷଣା, ଶିଳପୁଆ,      

ପଇସା ବାନ୍ଧି ଚକି ପେଷନ୍ତି,             

ଜିମରେ ଆମ ଛୁଆ |      

ଢେଙ୍କି କୁଟା ତ ହେଉନି ଆଉ,           

କୂଅରୁ ପାଣି ଝିକା,       

ଅଳସ ପାଇଁ ସଜ କରିଣ,            

ରୋଗ କିଣୁଛେ ଏକା |      

କାମ ହୁଅନ୍ତା, ଝାଳ ବୁହନ୍ତା,             

ସୁସ୍ଥ ରହନ୍ତା ଦେହ,       

ଅଳସ ହୋଇ ଦେହ ବଢ଼ାଇ,           

 ବ୍ୟାୟାମ କରୁଥାଅ |      

ହଜିଯାଇଛି ମାଟିର ରାସ୍ତା,             

ପିଚୁ, କଂକ୍ରିଟ ଧାରେ,      

ଖରାଦିନରେ ଚାଲିପାରେନି,            

କେହି ବି ଖାଲିପାଦରେ |   

   

ହଜିଯାଇଛି ଗାଁ ମୁଣ୍ଡର,               

ବରଗଛର ଛାଇ,       

ନଦୀମୁହାଣେ ବ୍ରିଜ ହୋଇଛି,            

ନାଉରୀ ନାଆ ନାହିଁ |      

ପାଖ ବାଟକୁ ଚାଲେନି କେହି,            

ଯାନ୍ତି ବାଇକି ଚଢ଼ି,       

ରୋଗ ବଢିଲେ ଶହେ କୋଶକୁ,           

ସକାଳେ ଯାଅ ଚାଲି |      

ସୁନ୍ଦର ଆଉ ଦିଶେନି କ୍ଷେତ,            

ନାହିଁ ବଳଦ ଚଷା,       

କଳ ଲଙ୍ଗଳ ବଦଳାଇଛି,             

ଚଷାଙ୍କର ବେଉସା |       

ପାଣି ଢାଳଟେ ଦିଶୁନି ଆଉ,           

ଅତିଥି ଆସିଥିଲେ,         

ହାତ ଗୋଡ ନ ଧୋଇଣ ସେ,          

ଘରେ ପ୍ରବେଶ କଲେ |       

ହଜି ଯାଇଛି ବାପ ପୁଅର,             

ସେନେହ କଥା ବାର୍ତ୍ତା,      

ମୋବାଇଲ ସହ କାମରେ ବ୍ୟସ୍ତ,          

ବୁଝେନା କେହି କା କଥା |     

ହଜିଯାଇଛି ଗୁରୁ ଶିଷ୍ୟର,             

ସମ୍ମାନସ୍ପଦ ପ୍ରଥା,       

ଗୁରୁଜନଙ୍କୁ ତାତ୍ସଲ୍ୟ କରେ,            

 ନୁଆଁଏ ନାଇଁ ମଥା |       

ହଜିଯାଇଛି ବୟୋଜ୍ୟେଷ୍ଠଙ୍କ,            

ମହତ୍ୱପୂର୍ଣ୍ଣ ବାଣୀ,       

ଜେଜେଙ୍କ ପାଶେ ବସେନି ନାତି,          

ଶୁଭେ ନାହିଁ କାହାଣୀ |       

ଭେଜାଲ ଅଟେ ସବୁ ଜିନିଷ,            

ମିଳେନି ଜମା ଭଲ,      

ଭେଜାକୁ ଆମ ନଷ୍ଟ କରଇ,            

ରୋଗରେ କଲବଲ |      

ହଜିଯାଇଛି ବଣ ଜଙ୍ଗଲ,              

ସୁଲୁସୁଲିଆ ବାଆ,      

ବାତ୍ୟା,ମରୁଡି,ମହାମାରୀରେ,           

 ଜଗତେ ଶୁଭେ ଆହାଃ |      

ହଜିଯାଇଛି ନୀତିକାନ୍ତି ଓ,             

ମନର ଶାନ୍ତି ଆମ,      

ସ୍ୱାର୍ଥପରତା ଭୁଲିଲେ ଯାଇ,            

ହସିବ ଧରା ଧାମ |

ହଜିଯିବାରେ ଆମେ ବି ଦିନେ,                                   ଏଇ ମାଟିମା' କୋଳେ,                                      ସୁକର୍ମ ଆମ ଅମର ହୋଇ,                                       ରହିବ ଭୂ -ମଣ୍ଡଳେ   ||