Library
Profile
ହଜିଲା ଦିନ ସ୍ମତିରୁ ପଦେ
ହଜିଲା ଦିନ ସ୍ମତିରୁ ପଦେ
ଗାଆଁ ଗଣ୍ଡଗୋଳ ଗାଆଁର ନିଶାପ
ଗାଆଁରେ ମୀମାସା ହୁଏ
ଗାଆଁର ସମ୍ମାନ ଗାଆଁର ଇଜ୍ଜତ
ଗାଆଁରେ ଯେ ରହି ଥାଏ ।
ଚୋରି ଦାରୀ ନାରୀ ଯେତେକ ଘଟଣା
ମୁଖିଆ ପାଖକୁ ଯାଏ
ମୁଖିଆ ଯାହା ଯେ ନିଷ୍ପତ୍ତି ଦିଅନ୍ତି
ମାନି ଥାନ୍ତି ତାକୁ ସିଏ ।
ପରିବାର ସଦସ୍ୟଙ୍କ ମଧ୍ୟେ ଯଦି
ମନ ମାଳିନ୍ୟଟି ହୁଏ
ଭିତରେ ଭିତରେ କୁହୁଳି ସେ କଳି
ଝଗଡାର ରୂପ ନିଏ ।
ସେ ଝଗଡା ବଢି ଭୟଙ୍କର ହେଲେ
ପରିବାର ଭାଙ୍ଗି ଥାଏ
ଝଗଡାର ସମାଧାନ ପାଇଁ କଥା
ମୁଖିଆ ପାଖକୁ ଯାଏ ।
ମୁଖିଆ ସମେତ ଗାଆଁ ଭଦ୍ରଲୋକ
ତଳେ ସିଏ ବସି ଥାଏ
ଉଭୟଙ୍କ କଥା ଶୁଣି ସାରି ଶେଷେ
ନିଷ୍ପତ୍ତିଟି ଶୁଣାଯାଏ ।
ବେଳେ ବେଳେ ସ୍ବାମୀ ସ୍ତ୍ରୀଙ୍କ ମଧ୍ୟରେ
ଏମିତି ଝଗଡା ହୁଏ
ପରିସ୍ଥିତି ପୁଣି ଛାଡପତ୍ର ଯାକେ
କଥା ତାର ଉଠି ଯାଏ ।
ଛାଡପତ୍ର ଆଗୁ କଥାଟି ମୁଖିଆ
ପାଖରେ ପହଞ୍ଚି ଯାଏ
ମୁଖିଆ ପହଞ୍ଚି ଭାଙ୍ଗିବା ସଂସାର
ବୁଝେଇ ଯୋଡିଣ ଦିଏ ।
ସାଇ ସାଇ ଗଣ୍ଡଗୋଳ ଯେବେ ହୁଏ
ନିଶାପଟି ବସି ଥାଏ
ଉଭୟ ଦଳର କଥା ଶୁଣାଯାଇ
ସମାଧାନ କରା ଯାଏ ।
ଦୁଇ ସାଇ ପୁଣି ଏକାଠି ଚଳନ୍ତି
ପର୍ବ ପର୍ବାଣୀଟି ହୁଏ
ଯାନି ଯାତ୍ରା ବେଳେ ନିଶା ଦ୍ରବ୍ୟସବୁ
ବର୍ଜନ ଯେ କରାଯାଏ ।
ବରଷକୁ ଥରେ ଗାଆଁରେ ଆମର
ଯାତ୍ରା କରା ଯାଉଥାଏ
ଦୂର ଦୂରାନ୍ତରୁ କେତେ ଲୋକ ଆସି
ଦେଖି ଯାଉଥାନ୍ତି ସିଏ ।
କୁଆଡୁ ଆସିଲା ଗୋଟିଏ ମଦୁଆ
ମଦକୁ ପିଇଲା ସିଏ
ତାର ସାଙ୍ଗ ଆମ ଗାଆଁର ପିଲାକୁ
ସେ ଦିନ ପିଆଇ ଦିଏ ।
ମଦ ନିଶା ଯେବେ ଘାରି ଗଲା ତାକୁ
ନିଜକୁ ଭୁଲିଲା ସିଏ
ପାଟିରୁ ତାହାର ଯାହା ବାହାରିଲା
ବକ ବକ ହେଉଥାଏ ।
କାହା କଥା କର୍ଣ୍ଣପାତ ସେ କଲାନି
ଯୁକ୍ତି ତର୍କ କରୁ ଥାଏ
ବେଳୁ ବେଳ ବେଶୀ ହେଲେ ସେ ଉଦ୍ଧତ
ଗଣ୍ଡଗୋଳ ବଢିଯାଏ ।
ଗାଆଁ ମୁଖିଆଙ୍କ ନିଷ୍ପତ୍ତିରେ ତାଙ୍କୁ
କୋଠଘରେ ରଖା ହୁଏ
ସେଇ କୋଠ ଘରେ ଶୋଇ ଶୋଇ ତାଙ୍କ
ରାତିଟି ଯେ ପାହିଯାଏ ।
ସକାଳ ହେବାରୁ ନିଶାପ ବସିଲା
ଜୋରିମନା ଦେଲା ସିଏ
ମାନ ଚାଲି ଗଲା ସମ୍ମାନ ବି ଗଲା
ପକେଟ୍ ବି ଖାଲି ହୁଏ ।
ଗାଆଁର ନିଶାପ ଶୁଣେଇ ଦିଅନ୍ତି
ମଦ ତ ଖାଇବ ଯିଏ
ଦଶ ହଜାରଟି ଜୋରିମନା ଦେବ
ଏଇ କଥା ପକା ହୁଏ ।
ଏଇ ନିଶାପଟି ଗାଆଁ ମାନି ନେଲା
ନା ମଦ ପିଇଲା କିଏ
ଗାଆଁର ସମ୍ମାନ ଗାଆଁର ଇଜ୍ଜତ
ଗାଆଁରେ ଯେ ରହି ଥାଏ ।
ହଜିଲା ଦିନର ଅତୀତର ସ୍ମୃତି
ଏବେବି ରହିଛି ସିଏ
ଗାଆଁର ସମସ୍ୟା ସମାଧାନ ସବୁ
ଗାଆଁ ନିଶାପରେ ହୁଏ ।
