ଗ୍ରହରାଜ

ଉତ୍ତାପରେ ଜଳ ହୁଏ ବିଶୋଷିତ

କରି ସୃଷ୍ଟି ଜଳସ୍ତର

ଗ୍ରହରାଜ ସୂର୍ଯ୍ୟ ନବଗ୍ରହ ମଧ୍ୟେ

ସର୍ବ ଶକ୍ତିର ଆଧାର। {୧}

ତାଙ୍କରି ଆଲୋକେ ବିଶ୍ୱ ଆଲୋକିତ

ଉତ୍ତାପରେ ଉତ୍ତାପିତ

ଅଂଶୁମାଳୀ ସିଏ ଜୀବଦାନ ପାଇଁ

ସମଗ୍ର ଜୀବଜଗତ। {୨}

ସବଳ ମଣିଷ କ୍ଷଣକେ ନିର୍ବଳ

ଦେହ ଝୋଲା ମରିଯାଏ

ତପନ ଉତ୍ତାପ ଆଣେ ଅଂଶୁଘାତ

ବିନା ରୋଗେ ମୃତ୍ୟୁ ହୁଏ। {୩}

ତେଜସ୍କର ଅଂଶୁ ଜନ-ପ୍ରାଣୀ ଦୁଃଖ

ଧରା ହରାଏ କ୍ଷମତା

ଧୂଳି, ଧୂଆଁ, ଜାଳ ଦୂଷିତ ବଢାଏ

ପରିବେଶ ଅସମତା। {୪}

ଗ୍ରାମରୁ ନଗର ନାହିଁ ସନ୍ତୁଳନ

ନାଶ କରି ବୃକ୍ଷଲତା

ଯେଣେ ଦେଖ ତେଣେ ତୋଳା ହୋଇଅଛି

କଂକ୍ରିଟ୍ ର ଗୃହ, ରାସ୍ତା। {୫}

ବିଶୋଷିତ ହୋଇ ନଥାଏ ଉତ୍ତାପ

ଦିଏ ପ୍ରଚଣ୍ଡ ଆଘାତ

ଗୋଡୁ ଗୋଛି ଉଠେ ପେଟ ଫୁଲିଯାଇ

ପଡି ଯାଏ ପାଟି ଦାନ୍ତ। {୬}

ହୋଇଣ ସତର୍କ ଟୋପି ମୁଣ୍ଡେ ଦେଇ

ଓଦା ଗାମୁଛା ରଖିବା

ଜୋତା ଛତା ନେଇ ଯାତାୟତ କରି

ପ୍ରଚୁର ପାଣି ପିଇବା। {୭}

ଲେମ୍ବୁ ଲୁଣ ପାଣି କାଞ୍ଜି ବା ତୋରାଣି

ବରଫ ପୁଡିଆ ଲଦି

ବୃକ୍ଷମୂଳେ ଆଶ୍ରା ବୁଦ୍ଧିମାନ କାର୍ଯ୍ୟ

ବୃଦ୍ଧି ହୁଏ ତାପ ଯଦି। {୮}

ବିପୁଳ ଜଙ୍ଗଲ କଲେ ସୃଷ୍ଟି ଜାଣ

ହୁଅଇ ଉତ୍ତାପ ହ୍ରାସ

ଅସମ୍ଭାଳ ଖରା ଶୀତଳଇ ଧରା

ଜୀବ ଜନ୍ତୁ ଓ ମଣିଷ। {୯}